News Update
எத்தியோப்பியாவின் உயரிய விருதைப் பெறும் முதல் உலகளாவிய தலைவர் என்ற பெருமையை இந்திய பிரதமர் நரேந்திர மோடி பெற்றுள்ளார்.
இந்திய பிரதமர் நரேந்திர மோடி, அரசு முறை பயணமாக ஜோர்டான், எத்தியோப்பியா, ஓமன் ஆகிய நாடுகளுக்கு சுற்றுப்பயணம் மேற்கொண்டுள்ளார். முதல் கட்டமாக பிரதமர் மோடி ஜோர்டானுக்கு நேற்று சென்றார். அங்கிருந்து எத்தியோப்பியா சென்றடைந்தார். அங்கு அந்நாட்டின் பிரதமர் அபி அகமது அலி அவரை வரவேற்றார். பின்னர் ஒருவரும் இரு நாட்டு உறவுகள் குறித்து பேச்சுவார்த்தை நடத்தினர்.
பிரதமர் நரேந்திர மோடிக்கு, எத்தியோப்பியாவின் மிக உயர்ந்த குடிமகன் விருதான ‘கிரேட் ஹானர் நிஷான் ஆஃப் எத்தியோப்பியா’ வழங்கப்பட்டது. இந்தியா, எத்தியோப்பியா உறவுகளை வலுப்படுத்துவதில் மோடியின் விதிவிலக்கான பங்களிப்பையும், உலகளாவிய அரசியல்வாதியாக அவரது தலைமையையும் அங்கீகரிக்கும் வகையில், அடிஸ் சர்வதேச மாநாட்டு மையத்தில் நடைபெற்ற சிறப்பு விழாவில், எத்தியோப்பியா பிரதமர் அபி அகமது இந்த விருதை வழங்கினார்.
இதற்கு நன்றியைத் தெரிவித்துக் கொண்ட பிரதமர் மோடி, உலகின் மிகப் பழமையான நாகரிகங்களில் ஒன்றான அபியிடமிருந்து இந்த விருதைப் பெறுவது ஒரு பாக்கியம் என்று கூறினார். இந்தச் செயலுக்காக பிரதமர் அபி மற்றும் எத்தியோப்பியா மக்களுக்கும் நன்றி தெரிவித்தார், மேலும் தேசிய ஒற்றுமை, நிலைத்தன்மை மற்றும் உள்ளடக்கிய வளர்ச்சியை மேம்படுத்துவதற்கான அபியின் முயற்சிகளைப் பாராட்டினார். தேசத்தைக் கட்டியெழுப்புவதில் அபியின் பங்கை பிரதமர் மோடி எடுத்துரைத்தார். மேலும் ஒரு நூற்றாண்டுக்கும் மேலாக எத்தியோப்பியாவின் முன்னேற்றத்திற்கு இந்திய ஆசிரியர்கள் பங்களித்து வருவதாகக் குறிப்பிட்டார்.
இரு தரப்பு உறவுகளை வளர்த்த இந்தியர்கள் மற்றும் எத்தியோப்பியர்களின் தலைமுறைகளுக்கு இந்த விருதை அர்ப்பணித்த பிரதமர் மோடி, 1.4 பில்லியன் இந்தியர்கள் சார்பாக மனமார்ந்த நன்றியைத் தெரிவித்தார்.
