கமல்ஹாசன் பட வசூலை முறியடித்த ரஜினியின் ‘கூலி’

நடிகர் ரஜினிகாந்த் நடிப்பில் லோகேஷ் கனகராஜ் இயக்கத்தில் உருவான  ‘கூலி’ திரைப்படம் நடிகர் கமல்ஹாசன் நடிப்பில் வெளியான ‘விக்ரம்’ படத்தின் வசூலை  மிஞ்சியுள்ளதாக தகவல் வெளியாகியுள்ளது.

நடிகர் ரஜினிகாந்த் நடிப்பில் லோகேஷ் கனகராஜ் இயக்கத்தில் உருவான ‘கூலி’ திரைப்படம் நேற்று வெளியாகியுள்ளது. இப்படத்தில் நாகார்ஜுனா, ஆமிர்கான், சௌபின் சாகிர், உபேந்திரா, சத்யராஜ், ஸ்ருதிஹாசன் உள்பட பலர் நடித்துள்ளனர். அனிருத் இசையமைத்துள்ள இப்படம் கலவையான விமர்சனங்களை பெற்றுள்ளது.

இப்படம் இந்தியா முழுவதும் முதல் நாள் திரையரங்குகள் மூலம் ரூ.65 கோடி வசூல் செய்துள்ளது. பாக்ஸ் ஆபீஸ் வசூல் குறித்த தகவல்களை வழங்கும் Sacnilk இணையதள தகவல்படி, முதல் நாளில் கூலி படம் 65 கோடி ரூபாய் வசூலித்துள்ளது. ‘கூலி’ உலகம் முழுவதும் சுமார் 100 கோடி ரூபாய்க்கும் மேல் வசூல் செய்ததாக தகவல்கள் வருகின்றன. ஆனால் தயாரிப்பு நிறுவனம் அதிகாரப்பூர்வமாக வசூல் குறித்து அறிவிக்கவில்லை.

‘கூலி’ படத்திற்கு முதல்நாள் வசூல் நல்ல தொடக்கம் என்றாலும், லோகேஷ் கனகராஜ் இயக்கத்தில் விஜய் நடித்த ‘லியோ’ படத்தின் முதல் நாள் வசூலான 76.2 கோடி ரூபாயை முறியடிக்கவிவ்லை. ஆனாலும் லோகேஷ் கனகராஜின் இயக்கத்தில் கமல்ஹாசன் நடித்த ‘விக்ரம்’ படத்தின் வசூலான 37.5 கோடி, கார்த்தி நடிப்பில் வெளியான ‘கைதி’ படத்தின் முதல் நாள் வசூலான 6.4 கோடி ரூபாயை முறியடித்துள்ளது.