சமையல் கியாஸ் சலுகை பெற நாளை முதல் ஆதார் பயோமெட்ரிக் கட்டாயம்: மத்திய அரசு புதிய அறிவிப்பு!

மானிய விலையில் சமையல் கியாஸ் சிலிண்டர் பெறும் நுகர்வோருக்கான புதிய விதிமுறைகளை மத்திய பெட்ரோலிய மற்றும் இயற்கை எரிவாயு அமைச்சகம் வெளியிட்டுள்ளது. அதன்படி, தொடர்ச்சியாக சலுகை விலையில் கியாஸ் சிலிண்டர்களைப் பெற ‘ஆதார் பயோமெட்ரிக் அங்கீகாரம்’ (Biometric Aadhaar Authentication) பெறுவது கட்டாயமாக்கப்பட்டுள்ளது.

முக்கிய விவரங்கள்:

• கட்டாயமாக்கப்படும் முறை: மானிய விலையிலான சிலிண்டர் முன்பதிவு தடையின்றி தொடர, நுகர்வோர் தங்களின் பயோமெட்ரிக் இ-கேஒய்சி பதிவை முடிக்க வேண்டும்.
• இதன் நோக்கம்: தகுதியான மற்றும் உண்மையான நுகர்வோருக்கு மட்டுமே அரசின் கியாஸ் சலுகை நேரடியாகச் சென்று சேருவதை உறுதி செய்வதற்காக இந்தத் சட்டம் நடைமுறைப்படுத்தப்பட்டுள்ளது.
• ஏற்கனவே செய்தவர்கள்: இதுவரை பயோமெட்ரிக் அங்கீகாரம் செய்து முடித்த நுகர்வோர் மீண்டும் செய்யத் தேவையில்லை; வழக்கம் போல் அவர்கள் சலுகை விலையில் சிலிண்டர்களைப் பெற்றுக் கொள்ளலாம்.

பயோமெட்ரிக் செய்ய விரும்பாதவர்களுக்கு என்ன

பயோமெட்ரிக் அங்கீகாரம் செய்ய விரும்பாத அல்லது இயலாத நுகர்வோர், எண்ணெய் நிறுவனங்களின் அதிகாரப்பூர்வ டிஜிட்டல் தளங்கள் (வெப் போர்ட்டல், செயலி, வாட்ஸ்அப் சாட்போட் அல்லது IVRS) மூலம் தங்களது விருப்பத்தைப் பதிவு செய்து கொள்ளலாம். இருப்பினும், அவ்வாறு செய்யாத பட்சத்தில் அவர்கள் சந்தை விலையின் அடிப்படையில் (மானியமின்றி) கியாஸ் சிலிண்டர்களைப் பெற நேரிடும்.

எங்கு, எப்படிச் சரிபார்க்கலாம்?

• சமையல் கியாஸ் விநியோகஸ்தரின் அலுவலகத்திற்கு நேரடியாகச் சென்றோ அல்லது சிலிண்டர் டெலிவரி செய்ய வரும் ஊழியரின் மொபைல் செயலி மூலமாகவோ நுகர்வோர் தங்களின் பயோமெட்ரிக் பதிவை உடனுக்குடன் செய்து கொள்ளலாம்.
• மேலும், இந்தியன் ஆயில் (IndianOil ONE), பாரத் கியாஸ் (HelloBPCL), ஹெச்பி கியாஸ் (HP PAY) போன்ற அதிகாரப்பூர்வ மொபைல் செயலிகள் மூலமாகவும் வீட்டிலிருந்தபடியே எளிதாகச் சரிபார்த்துக் கொள்ள வழிவகை செய்யப்பட்டுள்ளது.