மதுரை சிந்தாமணி காவல் நிலையத்தில் விசாரணைக்கு அழைத்துச் செல்லப்பட்ட பூசாரி உயிரிழப்பு: தாக்கியதாக உறவினர்கள் குற்றச்சாட்டு; மரண வாக்குமூல வீடியோ வைரல்!

மதுரை:

மதுரை சிந்தாமணி காவல் நிலையத்தில் விசாரணைக்கு அழைத்துச் செல்லப்பட்டபோது, போலீசார் பூட்ஸ் காலால் தாக்கியதில் கோயில் பூசாரி உயிரிழந்ததாக உறவினர்கள் பரபரப்பு குற்றச்சாட்டை முன்வைத்துள்ளனர். மேலும், தன்னை போலீசார் தாக்கியதாக அவர் பேசிய மரண வாக்குமூல வீடியோ சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது.

சம்பவத்தின் பின்னணி

மதுரை மேலஅனுப்பானடி ஹவுசிங் போர்டு காலனியைச் சேர்ந்தவர் பரமசிவம் (52). கோயில் பூசாரியான இவருக்கும், அப்பகுதியைச் சேர்ந்த மற்றொரு தரப்பினருக்கும் இடையே வாகனங்களை நிறுத்துவது தொடர்பாக முன்விரோதம் இருந்து வந்துள்ளது. கடந்த மாதம் இரு தரப்பினரிடையே ஏற்பட்ட மோதலில், பரமசிவத்தின் மனைவி அய்யம்மாளுக்கு தலையில் காயம் ஏற்பட்டு மதுரை அரசு மருத்துவமனையில் அனுமதிக்கப்பட்டார். இது தொடர்பாக இரு தரப்பினரும் சிந்தாமணி காவல் நிலையத்தில் மாறி மாறி புகார் அளித்தனர்.

பூட்ஸ் காலால் தாக்கியதாக குற்றச்சாட்டு

புகார் தொடர்பாக கடந்த மாதம் 19-ஆம் தேதி பரமசிவத்தை போலீசார் விசாரணைக்காக காவல் நிலையத்திற்கு அழைத்துச் சென்றனர். அப்போது காவல் நிலையத்தில் வைத்து போலீசார் அவரை கைகளாலும், பூட்ஸ் கால்களாலும் கடுமையாகத் தாக்கியதாகக் கூறப்படுகிறது.

வீடு திரும்பிய பரமசிவத்திற்கு தொடர் தலைவலி, வாந்தி மற்றும் மயக்கம் ஏற்பட்டது. இதையடுத்து அவர் மதுரை அரசு மருத்துவமனையிலும், பின்னர் மேல் சிகிச்சைக்காக தனியார் மருத்துவமனையிலும் அனுமதிக்கப்பட்டார். அங்கு தலையில் அறுவை சிகிச்சை செய்யப்பட்ட நிலையில், சிகிச்சை பலனின்றி நேற்று அவர் உயிரிழந்தார்.

வைரலாகும் மரண வாக்குமூலம் – முதல்வர் தனிப்பிரிவில் மனு

உயிரிழப்பதற்கு முன்பாக பரமசிவம் பதிவு செய்த வீடியோவில், “போலீசார் என்னை கடுமையாகத் தாக்கினர். எனது உயிருக்கு ஏதேனும் ஆபத்து ஏற்பட்டால் அதற்கு காவல்துறையே காரணம்; அவர்கள் மீது கடும் நடவடிக்கை எடுக்க வேண்டும்” என்று பேசியுள்ளார். இந்த வீடியோ தற்போது சமூக வலைதளங்களில் வைரலாகி வருகிறது.

இச்சம்பவம் தொடர்பாக பரமசிவத்தின் மனைவி அய்யம்மாள், முதல்வர் தனிப்பிரிவு, மாவட்ட ஆட்சியர் மற்றும் மாநகர காவல் ஆணையர் ஆகியோருக்கு புகார் மனு அனுப்பியுள்ளார். அதில், பரமசிவத்தின் மரணத்திற்கு காரணமான சிந்தாமணி காவல் நிலைய போலீசார் மீது கடும் நடவடிக்கை எடுக்க வேண்டும் என வலியுறுத்தியுள்ளார்.

போலீசாரின் விளக்கம்

இக்குற்றச்சாட்டு குறித்து காவல்துறை தரப்பில் கூறுகையில்:

“பரமசிவம் போலீசாரால் தாக்கப்பட்டு உயிரிழக்கவில்லை. இருதரப்பு புகாரின் பேரில் அவர் கைது செய்யப்பட்டு சொந்த ஜாமீனில் விடுவிக்கப்பட்டார். அவருக்கு ஏற்கெனவே உடல்நலப் பாதிப்பு இருந்துள்ளது. வீட்டில் தவறி விழுந்ததாகக் கூறித்தான் அவர் மருத்துவமனையில் அனுமதிக்கப்பட்டார். அவரது இறப்பிற்கான உண்மையான காரணம் பிரேதப் பரிசோதனை அறிக்கை மற்றும் நடைபெற்று வரும் ஆர்.டி.ஓ விசாரணையின் முடிவிலேயே தெரியவரும்.”