கொல்கத்தாவில் பிரமாண்டம்: 12-வது சர்வதேச யோகா தின விழாவைத் தலைமை தாங்கி நடத்தினார் பிரதமர் மோடி!

கொல்கத்தா (ஜூன் 21): உலக அளவில் யோகா கலையின் முக்கியத்துவத்தை பறைசாற்றும் வகையில், 12-வது சர்வதேச யோகா தினம் இன்று நாடு முழுவதும் கோலாகலமாகக் கொண்டாடப்பட்டது. இதன் முதன்மை தேசிய நிகழ்ச்சி மேற்கு வங்க மாநிலம் கொல்கத்தாவில் உள்ள வரலாற்றுச் சிறப்புமிக்க ‘ரெட் ரோட்’ (Red Road) மைதானத்தில் நடைபெற்றது. இதில் பிரதமர் நரேந்திர மோடி கலந்துகொண்டு, ஆயிரக்கணக்கான பொதுமக்களுடன் இணைந்து யோகாசனப் பயிற்சிகளை மேற்கொண்டார்.

ஆரோக்கியமான முதுமைக்கு யோகா

இந்த ஆண்டின் சர்வதேச யோகா தினம் “ஆரோக்கியமான முதுமைக்கான யோகா” (Yoga for Healthy Ageing) என்ற உன்னதக் கருப்பொருளை (Theme) மையமாகக் கொண்டு கடைப்பிடிக்கப்பட்டது.

நிகழ்ச்சியில் நாட்டு மக்களுக்கு உரையாற்றிய பிரதமர் நரேந்திர மோடி,

“ஜூன் 21 என்பது பூமியின் மிக நீண்ட நாளாகும். யோகா கலையின் வாயிலாக இந்நாள் தற்போது உலகின் மிகப்பெரிய சமூகக் கொண்டாட்ட நாளாக மாறியுள்ளது. யோகா என்பது வெறும் உடற்பயிற்சி மட்டுமல்ல; அது மனித ஆன்மாவின் வெளிப்பாடு. இது மக்களை ஒன்றிணைக்கிறது” என்று குறிப்பிட்டார்.

35 ஆயிரம் பேருடன் பிரமாண்ட பயிற்சி

கொல்கத்தாவில் நடைபெற்ற இந்த பிரதான அமர்வில், யோகா அமைப்புகள், பள்ளி மற்றும் கல்லூரி மாணவ-மாணவிகள், சமூகக் குழுக்கள் என சுமார் 35,000-க்கும் மேற்பட்டோர் பிரதமருடன் ஒரே நேரத்தில் யோகா பயிற்சிகளைச் செய்தனர். மேற்கு வங்க மாநிலத்தில் பிரதமர் மோடி தலைமையில் தேசிய யோகா திருவிழா நடைபெறுவது இதுவே முதல் முறை என்பது குறிப்பிடத்தக்கது.

இதன் ஒரு பகுதியாக, ஹூக்ளி நதியில் சுமார் 500 படகுகளில் அமர்ந்து கொண்டு நூற்றுக்கணக்கானோர் ஒரே நேரத்தில் யோகா செய்த காட்சி அனைவரையும் கவர்ந்தது.

உலக அளவில் சாதனைப் பதிவு

மத்திய ஆயுஷ் அமைச்சகத்தின் கீழ், இந்த ஆண்டு பிரதமருடன் இணைந்து ஒரே நேரத்தில் யோகா செய்வதற்காக ‘யோகா சங்கம்’ என்ற ஆன்லைன் தளத்தில் லட்சக்கணக்கான அமைப்புகள் பதிவு செய்திருந்தன. இதில் நாடு முழுவதிலும் இருந்து சுமார் 3.22 லட்சம் அரசு நிறுவனங்கள் மற்றும் 2 லட்சம் கல்வி நிறுவனங்கள் பங்கேற்றன. மாநில வாரியாக மேற்கு வங்காளம் 2.76 லட்சம் பதிவுகளுடன் முதலிடத்தைப் பிடித்து சாதனை படைத்துள்ளது.

இந்தியாவின் 100 முக்கிய வரலாற்றுத் தலங்கள் மற்றும் வெளிநாடுகளில் உள்ள 210 இந்தியத் தூதரகங்கள் மூலமாக உலகெங்கும் சுமார் 2,500 இடங்களில் இந்த யோகா தினக் கொண்டாட்டங்கள் மிகச் சிறப்பாக நடத்தப்பட்டன.

தூத்துக்குடி போதையில் தொழிலாளி அடித்துக் கொலை 4 பேர் கைது…