மாண்புமிகு பேசும் வார்த்தைகளா இது?” ஆடியோ சர்ச்சையில் வெடிக்கும் கேள்விகள்! முடங்குமா அமைச்சரின் பதவி?

​சென்னை:

​சமூக வலைதளங்களில் தீயாகப் பரவி வரும் ‘மிரட்டல் ஆடியோ’ விவகாரம், தமிழக அரசியல் களத்தில் பெரும் புயலைக் கிளப்பியுள்ளதுடன், அரசின் நிர்வாக நேர்மைக்கே மிகப்பெரிய சோதனையாக உருவெடுத்துள்ளது.

​உயர் பொறுப்பில் இருக்கும் மக்கள் பிரதிநிதிகள் பேசும் பேச்சுக்கள் பொதுமக்களிடையேயும் அரசியல் வட்டாரத்திலும் பெரும் அதிர்வலைகளை ஏற்படுத்தியுள்ள நிலையில், இதில் உரிய நடவடிக்கை எடுக்கப்படாமல் இருப்பது குறித்துச் சமூக ஆர்வலர்களும் எதிர்க்கட்சிகளும் காரசாரமாகக் கேள்வி எழுப்பி வருகின்றனர்.

​”இதுதான் மாண்புமிகுக்கள் பேசும் இலக்கணமா?” – பொதுமக்கள் கொந்தளிப்பு!

​ராஜபாளையம் பகுதியில் அரசு அலுவலகங்களில் லட்டு வழங்கிய விவகாரம் மற்றும் சமூக வலைதளங்களில் கசிந்த ஆடியோவில், “தூக்கிவச்சி அடிச்சு கொன்னுடுவேன்” போன்ற ஆவேசமான மற்றும் மிரட்டல் தொனியிலான வார்த்தைகள் இடம்பெற்றிருந்தது பெரும் சர்ச்சையானது.

​”பொதுமக்களுக்கு முன்மாதிரியாகத் திகழ வேண்டிய ஒரு உயர்பதவி வகிப்பவர் பேசும் வார்த்தைகளா இவை? ‘மாண்புமிகு’ என்ற சொல்லுக்கு உரிய மரியாதையை இவர்கள் காப்பாற்றுகிறார்களா?” எனச் சமூக ஆர்வலர்கள் மிகக் காட்டமாகக் கேள்வி எழுப்பி வருகின்றனர்.

​நடவடிக்கை எடுக்காமல் மௌனம் காப்பது ஏன்?

​இந்த சர்ச்சையின் தீவிரத்தைக் கருத்தில் கொண்டு, உடனடியாக விசாரணை நடத்தப்பட்டுச் சம்பந்தப்பட்டவர்கள் மீது தகுந்த நடவடிக்கை எடுக்கப்படும் என எதிர்பார்க்கப்பட்டது.

​ஏற்கனவே இந்த விவகாரத்தில் கட்சி நிர்வாகி ஒருவர் மீது நடவடிக்கை எடுக்கப்பட்ட போதிலும், “ஆடியோவில் அப்பட்டமாக மிரட்டிய சமூக நலத்துறை அமைச்சருக்கு மட்டும் பதவியில் நீடிப்பா?” என்ற கேள்வி சோஷியல் மீடியாவில் கொந்தளிப்பை ஏற்படுத்தியுள்ளது.

​சட்டம் அனைவருக்கும் ஒன்றுதானே?: ஒரு சாதாரண நிர்வாகி தவறாகப் பேசினாலும், உயர்பதவியில் இருக்கும் அமைச்சரே பேசினாலும் “தவறு என்பது என்றுமே தவறுதான்!” என்பதைச் சுட்டிக்காட்டும் மக்கள், இதில் சமரசம் செய்யக்கூடாது என வலியுறுத்துகின்றனர்.

​அரசின் பிம்பத்திற்கு ஆபத்து:

 இந்த விஷயத்தில் தொடர்ந்து நிலவும் அமைதியும் தாமதமும், ‘மக்களுக்கான அரசு’ என்ற நம்பிக்கையைக் கேள்விக்குறியாக்கும் என அரசியல் விமர்சகர்கள் எச்சரிக்கின்றனர்.

​சட்டப்பேரவையில் புயலைக் கிளப்ப எதிர்க்கட்சிகள் வியூகம்!

​வரவிருக்கும் சட்டமன்றக் கூட்டத்தொடரில் இந்த ஆடியோ விவகாரத்தை முதன்மை ஆயுதமாகக் கையிலெடுக்க எதிர்க்கட்சிகள் தீவிரமாகத் திட்டமிட்டு வருகின்றன.

​அவையில் எதிர்க்கட்சிகள் கேள்வி எழுப்புவதற்கு முன்பாகவே, அரசின் நன்மதிப்பைக் காப்பாற்ற முதலமைச்சர் ஜோசப் விஜய்  தரப்பில் இருந்து அதிரடி நடவடிக்கைகள் பாயுமா? அல்லது அமைச்சரின் பதவி தப்புமா? என்பதை முழுத் தமிழகமும் உற்றுநோக்கிக் கொண்டிருக்கிறது!

ஆடிப்பெருக்கை முன்னிட்டு பத்திரப்பதிவுக்கு கூடுதல் டோக்கன்கள் ஒதுக்கீடு: பதிவுத்துறை அறிவிப்பு