லண்டனில் அஜித் பங்கேற்கும் சர்வதேச கார் பந்தயம்: முதலமைச்சர் விஜய் தொடங்கி வைக்கிறார்!

லண்டன்:

தமிழகத்திற்கு புதிய தொழில் முதலீடுகளை ஈர்க்கும் வகையில் 6 நாள் அரசுமுறைப் பயணமாக பிரிட்டன் சென்றுள்ள தமிழக முதலமைச்சர் விஜய், அங்கு நடிகர் அஜித் குமார் பங்கேற்கும் புகழ்பெற்ற சர்வதேச கார் பந்தயத்தைத் தொடங்கி வைக்கிறார்.

லண்டனில் உற்சாக வரவேற்பு

தமிழகத்தில் புதிய வேலைவாய்ப்புகளை உருவாக்கவும், தொழில் முதலீடுகளை ஈர்க்கவும் முதலமைச்சர் விஜய் துபாய் வழியாக லண்டன் ஹீத்ரோ விமான நிலையத்தை சென்றடைந்தார். விமான நிலையத்தில் அவருக்குப் பிரிட்டன் தமிழ் சங்கம் மற்றும் பிரிட்டன் வாழ் தமிழர்கள் மலர்க்கொத்து கொடுத்து உற்சாக வரவேற்பு அளித்தனர். லண்டன் பிரிட்ஜ் பகுதியில் உள்ள பிரபல ‘தி ஷார்ட்’ கட்டிடத்தில் உள்ள ஹோட்டலில் அவர் தங்கியுள்ளார்.

கார் பந்தயத்தை தொடங்கி வைக்கிறார்

பிரிட்டன் பயணத்தின் முக்கிய நிகழ்வாக, முதலமைச்சர் விஜய் புகழ்பெற்ற சில்வர்ஸ்டோன் மோட்டார் பந்தயத் திடலுக்கு செல்கிறார். அங்கு நடைபெறும் ‘மிச்செலின் லீ மான்ஸ் கோப்பை’ கார் பந்தயத்தை அவர் கொடியசைத்துத் தொடங்கி வைக்கிறார்.

இந்தப் போட்டியில் பிரபல நடிகர் அஜித் குமார் பந்தய வீரராகக் களம் இறங்குகிறார். அவருடன் இந்தியாவின் முன்னணி கார் பந்தய வீரர்களும் கலந்து கொள்கின்றனர்.

மோட்டார் ஸ்போர்ட்ஸ் நகர திட்டம்

தமிழகத்தில் உலகத்தரம் வாய்ந்த ‘மோட்டார் ஸ்போர்ட்ஸ் நகரம்’ அமைக்கப்படும் என ஏற்கனவே சட்டப்பேரவையில் அறிவிக்கப்பட்டிருந்த நிலையில், சர்வதேச தரத்திலான சில்வர்ஸ்டோன் பந்தயக் களத்தின் உள்கட்டமைப்பு வசதிகள், பாதுகாப்பு ஏற்பாடுகள் மற்றும் வணிக ரீதியான வழிமுறைகளை முதலமைச்சர் விஜய் நேரில் ஆய்வு செய்கிறார்.

விளையாட்டுச் சுற்றுலா, மின்சார வாகனங்கள் மற்றும் மோட்டார் பந்தயத் துறை சார்ந்த முதலீடுகளைத் தமிழகத்திற்கு ஈர்ப்பதற்கான சாத்தியக்கூறுகளையும் அவர் தொடர்ந்து ஆராய உள்ளார்.