TNPSC குரூப்-1 முதல்நிலைத் தேர்வு: 2 மாதங்களில் தேர்வு முடிவுகள் வெளியீடு!

மதுரை:

தமிழ்நாடு அரசுப் பணியாளர் தேர்வாணையம் (TNPSC) சார்பில் நடைபெற்ற குரூப்-1 முதல்நிலைத் தேர்வை தமிழகம் முழுவதும் 1 லட்சத்து 65 ஆயிரத்து 828 பேர் எழுதியுள்ளனர். இதில் 57,612 பேர் தேர்வு எழுத வரவில்லை என்பது குறிப்பிடத்தக்கது.

46 காலிப்பணியிடங்கள்:

TNPSC குரூப்-1 பணியிடங்களான 12 துணை கலெக்டர், 2 வணிகவரி உதவி ஆணையர், 3 கூட்டுறவு சங்கங்களின் துணைப்பதிவாளர், 8 தமிழ்நாடு பதிவு பணி மாவட்ட பதிவாளர், ஒரு தொழிலாளர் உதவி ஆணையர் என மொத்தம் 26 காலிப்பணியிடங்களை நிரப்புவதற்கான அறிவிப்பு கடந்த ஜூன் 23 அன்று வெளியிடப்பட்டது. இதற்கு ஜூலை 29 வரை விண்ணப்பிக்க அவகாசம் வழங்கப்பட்ட நிலையில், மேலும் 20 காலிப்பணியிடங்கள் அதிகரிக்கப்பட்டு மொத்த காலியிடங்களின் எண்ணிக்கை 46 ஆனது.

தேர்வு நிலவரம்:

இந்தத் தேர்வுக்கு தமிழகம் முழுவதும் 95,984 ஆண்கள், 1,27,441 பெண்கள் மற்றும் 15 மூன்றாம் பாலினத்தவர்கள் என மொத்தம் 2,23,440 பேர் அனுமதிக்கப்பட்டிருந்தனர். நேற்று (செப்டம்பர் 27) தமிழகம் முழுவதும் 754 தேர்வு மையங்களில் முதல்நிலைத் தேர்வு நடைபெற்றது.

இதில், மொத்தம் 1,65,828 பேர் (74.22%) மட்டுமே தேர்வு எழுதினர். தேர்வு எழுதாமல் 57,612 பேர் (25.78%) ‘ஆப்சென்ட்’ ஆகியுள்ளனர். முதல்நிலைத் தேர்வில் தேர்ச்சி பெறுபவர்கள் மட்டுமே அடுத்த கட்டமான முதன்மைத் தேர்வுக்கு அழைக்கப்படுவார்கள்.

2 மாதங்களில் தேர்வு முடிவு:

தேர்வு முடிவுகள் குறித்து டி.என்.பி.எஸ்.சி. தலைவர் எஸ்.கே.பிரபாகர் நிருபர்களிடம் கூறுகையில், “குரூப்-1 முதல்நிலைத் தேர்வின் முடிவுகள் அடுத்த 2 மாதங்களுக்குள் வெளியிடப்படும்” என்று தெரிவித்தார். மேலும், முழுமையான தேர்வு முடிவுகள் வெளியாகும் போது கூடுதல் காலிப்பணியிடங்கள் அறிவிக்கப்பட வாய்ப்புள்ளதாகவும் அவர் குறிப்பிட்டார்.