மதுரையில் அரசு பஸ் எல்.இ.டி. திரையில் சர்ச்சை வாசகம்: பயணிகள் குழப்பம், வைரல் வீடியோவால் பரபரப்பு

மதுரை: மதுரையிலிருந்து ராமநாதபுரத்திற்கு இயக்கப்பட்ட அரசுப் பேருந்தின் எல்.இ.டி. பெயர் பலகையில் சர்ச்சைக்குரிய வாசகம் இடம்பெற்ற சம்பவம் பயணிகள் மற்றும் பொதுமக்களிடையே பெரும் பரபரப்பை ஏற்படுத்தியுள்ளது.

மதுரை மாட்டுத்தாவணி பேருந்து நிலையத்திலிருந்து ராமநாதபுரம் நோக்கிச் சென்ற அரசுப் பேருந்தின் வழித்தடப் பலகையில், ஊரின் பெயருக்குப் பதிலாக “Madurai Payalugada.. Horror…” (மதுரை பயலுகடா.. கொடூரமடா…) என்ற வாசகம் ஆங்கிலத்தில் ஒளிபரப்பாகியுள்ளது. இதனைப் பார்த்த பயணிகள், அந்தப் பேருந்து எந்த ஊருக்குச் செல்கிறது என்பதை அறிய முடியாமல் குழப்பமடைந்தனர்.

இது தொடர்பான வீடியோ காட்சிகள் தற்போது சமூக வலைத்தளங்களில் வேகமாகப் பரவி வருகிறது.

சமீபகாலமாக அரசுப் பேருந்துகளில் உள்ள எல்.இ.டி. பெயர் பலகைகளின் தொழில்நுட்ப அமைப்புகளை மர்ம நபர்கள் ஹேக் செய்தோ அல்லது தவறாக மாற்றியோ, ஊர் பெயர்களுக்குப் பதிலாக வேறு தேவையில்லாத வார்த்தைகளை இடம்பெறச் செய்யும் சம்பவங்கள் தொடர்ந்து அதிகரித்து வருகின்றன.

எனவே, இதுபோன்ற சம்பவங்கள் மீண்டும் நடைபெறாமல் தடுக்கவும், எல்.இ.டி. திரைகளின் பாதுகாப்பை உறுதி செய்யவும் போக்குவரத்துத் துறை உரிய நடவடிக்கை எடுக்க வேண்டும் எனப் பயணிகள் மற்றும் பொதுமக்கள் கோரிக்கை விடுத்துள்ளனர்.