Jio News Tamil
பல்லடம்:
திருப்பூர் மாவட்டம் பல்லடம் அருகே, மனைவியுடன் திருமணத்தை மீறிய உறவில் ஈடுபட்ட டெய்லரை, அவரது கணவர் அடித்துக் கொலை செய்து சடலத்தை காட்டுப் பகுதியில் வீசிச் சென்ற சம்பவம் பெரும் பரபரப்பை ஏற்படுத்தியுள்ளது.
சம்பவத்தின் பின்னணி:
திருப்பூர் மாவட்டம் பல்லடம் அடுத்த அருள்புரம் பகுதியைச் சேர்ந்தவர் கோபிநாத் (36). இவர் அங்குள்ள ஒரு பனியன் நிறுவனத்தில் டெய்லராகப் பணியாற்றி வந்தார். கோபிநாத் வசித்து வந்த அதே வாடகை வீட்டில், மதுரையைச் சேர்ந்த விக்னேஷ் வர்மா மற்றும் அவரது மனைவி பிரியா ஆகியோர் தங்கியிருந்தனர்.
ஒரே குடியிருப்பில் வசித்தபோது, கோபிநாத்திற்கும் பிரியாவிற்கும் இடையே பழக்கம் ஏற்பட்டு, அது திருமணத்தை மீறிய உறவாக மாறியதாகக் கூறப்படுகிறது. இதையறிந்த விக்னேஷ் வர்மா, கோபிநாத்தை எச்சரித்ததுடன், தனது மனைவியுடன் அங்கிருந்து வீட்டை காலி செய்து மகாலட்சுமிபுரம் பகுதிக்குக் குடிபெயர்ந்தார்.
காட்டுப் பகுதிக்கு அழைத்துச் சென்ற டெய்லர்:
வீடு மாறினாலும், கோபிநாத் மற்றும் பிரியா இடையேயான பழக்கம் தொடர்ந்தே வந்துள்ளது. கடந்த 5 நாட்களுக்கு முன்பு இரவு நேரத்தில், கோபிநாத் பிரியாவை மாதப்பூர் காட்டுப் பகுதிக்கு வரவழைத்துள்ளார். இது குறித்து ஏற்கனவே சந்தேகத்தில் இருந்த விக்னேஷ் வர்மா, ரகசியமாக அவர்களைப் பின்தொடர்ந்து சென்றுள்ளார்.
அடித்துக் கொலை செய்து உடல் வீச்சு:
காட்டுப் பகுதியில் இருவரும் தனிமையில் இருந்ததைக் கண்டு ஆத்திரமடைந்த விக்னேஷ் வர்மா, கோபிநாத் மீது கடும் தாக்குதல் நடத்தியுள்ளார். இதில் பலத்த காயமடைந்த கோபிநாத் சம்பவ இடத்திலேயே உயிரிழந்தார். உடனே, கொலையை மறைப்பதற்காக அங்கிருந்த குப்பைக் கூளங்களுக்கு நடுவே கோபிநாத்தின் உடலை வீசிவிட்டு, தனது மனைவியுடன் விக்னேஷ் வர்மா தப்பிச் சென்றுள்ளார்.
போலீஸ் விசாரணை:
தனது மகனைக் காணவில்லை என கோபிநாத்தின் தாயார் பல்லடம் காவல் நிலையத்தில் புகார் அளித்திருந்தார். இது தொடர்பாகப் போலீசார் தேடுதல் வேட்டையில் ஈடுபட்டிருந்த நிலையில், இன்று மாதப்பூர் காட்டுப் பகுதியில் அழுகிய நிலையில் கோபிநாத்தின் சடலம் கண்டெடுக்கப்பட்டது.
இதனைத் தொடர்ந்து வழக்குப் பதிவு செய்த பல்லடம் போலீசார், கோபிநாத்தின் உடலைக் கைப்பற்றி பிரேதப் பரிசோதனைக்கு அனுப்பி வைத்தனர். மேலும், தலைமறைவாக உள்ள விக்னேஷ் வர்மாவைத் தீவிரமாகத் தேடி வருகின்றனர்.
Manoj