தமிழகத்தின் முன்னணி தடகள வீராங்கனையான தனலட்சுமி சேகர் மீண்டும் ஊக்கமருந்து சோதனையில் சிக்கியிருப்பது, தமிழக விளையாட்டுத் துறையில் பெரும் அதிர்ச்சியை ஏற்படுத்தியுள்ளது.
இந்தியத் தடகள அரங்கில் அதிவேக வீராங்கனையாகக் கருதப்பட்ட அவர், தடையை மீறி ஊக்கமருந்து பயன்படுத்தியது உறுதி செய்யப்பட்டுள்ளது.
இந்திய தடகளத் துறையில் தமிழகத்தைச் சேர்ந்த வீராங்கனைகள் சமீபகாலமாகப் பெரும் சாதனைகளைப் படைத்து வருகின்றனர்.
அந்த வரிசையில், 100 மீட்டர் மற்றும் 200 மீட்டர் ஓட்டப்பந்தயங்களில் இந்தியாவின் நம்பிக்கை நட்சத்திரமாகத் திகழ்ந்தவர் திருச்சி மாவட்டத்தைச் சேர்ந்த தனலட்சுமி சேகர். இவர் தற்போது ஊக்கமருந்து சோதனையில் தோல்வியடைந்துள்ள செய்தி, விளையாட்டு வீரர்கள் மற்றும் ஆர்வலர்கள் மத்தியில் பெரும் அதிர்ரச்சியையும், விவாதத்தையும் ஏற்படுத்தியுள்ளது.
யார் இந்த தனலட்சுமி?
திருச்சியில் ஒரு சாதாரண குடும்பத்தில் பிறந்து, கடும் போராட்டங்களுக்குப் பிறகு சர்வதேச தரத்திற்கு உயர்ந்தவர் தனலட்சுமி. 2021ஆம் ஆண்டு நடைபெற்ற தேசிய ஃபெடரேஷன் கோப்பை தடகளப் போட்டியில், இந்தியாவின் மின்னல் வேக மங்கை பி.டி. உஷாவின் சாதனையை (200 மீட்டர் பிரிவில்) முறியடித்து தேசிய அளவில் கவனம் ஈர்த்தார்.
அதே போட்டியில் இந்தியாவின் நட்சத்திர ஓட்டப்பந்தய வீராங்கனை டூட்டி சந்தையும் தோற்கடித்தார். இதன் மூலம் டோக்கியோ ஒலிம்பிக் போட்டிக்கும் அவர் தேர்வானார்.
சோதனையும்; தடையுமும்
தனலட்சுமிக்கு எதிராக தேசிய ஊக்கமருந்து எதிர்ப்பு முகமை (NADA) மற்றும் சர்வதேச தடகள ஒருமைப்பாட்டு அமைப்பு (AIU) ஆகியவை அவ்வப்போது சோதனைகளை நடத்தும். இதில், கடந்த முறை அவர் வெளிநாட்டில் பயிற்சியில் இருந்தபோது எடுக்கப்பட்ட சிறுநீர் மாதிரியில், தடை செய்யப்பட்ட ஊக்கமருந்து பொருட்கள் இருப்பது கண்டறியப்பட்டது.
இதன் விளைவாக, அவருக்கு “3 ஆண்டுகள் விளையாடத் தடை” விதிக்கப்பட்டது. ஏற்கனவே 2022-ஆம் ஆண்டு காமன்வெல்த் போட்டிகளுக்குச் செல்லவிருந்த நிலையில், இதேபோன்று ஊக்கமருந்து சோதனையில் சிக்கி அவர் வாய்ப்பை இழந்தது குறிப்பிடத்தக்கது. தற்போது மீண்டும் அதே புகாரில் அவர் சிக்கியிருப்பது அவரது விளையாட்டு வாழ்க்கையையே கேள்விக்குறியாக்கியுள்ளது.
விளைவுகள் என்ன?
போட்டித் தடை: தற்போது விதிக்கப்பட்டுள்ள தடையால், அவர் அடுத்த 8 ஆண்டுகளுக்கு எந்தவொரு தேசிய மற்றும் சர்வதேசப் போட்டிகளிலும் பங்கேற்க முடியாது.
சாதனைகள் ரத்து: அவர் ஊக்கமருந்து உட்கொண்டதாக உறுதி செய்யப்பட்ட காலகட்டத்தில் வென்ற பதக்கங்கள் மற்றும் படைத்த சாதனைகள் முறைப்படி திரும்பப் பெறப்படலாம்.
நிதி இழப்பு: அரசு வழங்கிய ஊக்கத்தொகை மற்றும் ஸ்பான்சர்ஷிப் ஒப்பந்தங்கள் ரத்து செய்யப்பட வாய்ப்புள்ளது.
தமிழகத்திற்குப் பின்னடைவு:
ஆசிய விளையாட்டுப் போட்டிகள் மற்றும் ஒலிம்பிக் போட்டிகளில் தமிழகத்திற்குப் பதக்கம் பெற்றுத் தருவார் என எதிர்பார்க்கப்பட்ட ஒரு வீராங்கனை இப்படி சிக்கியது தமிழக விளையாட்டுத் துறைக்குப் பின்னடைவாகப் பார்க்கப்படுகிறது.
வீரர்களுடைய அறியாமை:
பல நேரங்களில் வீரர்கள் தாங்கள் உட்கொள்ளும் மருந்துகளில் (சாதாரண காய்ச்சல் அல்லது வலி நிவாரணிகள்) தடை செய்யப்பட்ட வேதிப்பொருட்கள் இருப்பது தெரியாமல் உட்கொண்டு விடுகின்றனர்.
அழுத்தம்: பதக்கம் வெல்ல வேண்டும் என்ற அதீத மன அழுத்தம் இதுபோன்ற தவறான முடிவுகளுக்கு வீரர்களைத் தள்ளுகிறது.
விளையாட்டு வீரர்களுக்கு இது ஒரு பாடம்
தனலட்சுமி போன்ற திறமையான ஒரு வீராங்கனை இத்தகைய சர்ச்சையில் சிக்கியது வருத்தமளிப்பதாகப் பயிற்சியாளர்கள் தெரிவிக்கின்றனர்.
இருப்பினும், ஊக்கமருந்து இல்லாத தூய்மையான விளையாட்டுத் துறையை (Clean Sports) உருவாக்க இத்தகைய கடுமையான நடவடிக்கைகள் அவசியம் என NADA வலியுறுத்துகிறது.
விளையாட்டு வீரர்கள் தங்களது உடல் வலிமையை அதிகரிக்கத் தவறான வழிகளைப் பின்பற்றுவது அவர்களது வாழ்நாள் உழைப்பையே வீணாக்கிவிடும் என்பதற்கு இந்தச் சம்பவம் ஒரு சான்று என்று மூத்த விளையாட்டு வீரர்களும் பயிற்சியாளர்களும் கூறுகிறார்கள்.
