தேர்தல் விடுமுறை: ஆம்னி பேருந்துகளில் கட்டணம் பலமடங்கு உயர்வு – பொதுமக்கள் அவதி

சென்னை: தமிழக சட்டப்பேரவைத் தேர்தலை முன்னிட்டு, சொந்த ஊர்களுக்குச் செல்லும் மக்களின் தேவையைப் பயன்படுத்தி ஆம்னி பேருந்துகளில் கட்டணம் பலமடங்கு உயர்த்தப்பட்டுள்ளது பயணிகளிடையே பெரும் அதிர்ச்சியை ஏற்படுத்தியுள்ளது.

தமிழகத்தில் வரும் ஏப்ரல் 23-ஆம் தேதி (வியாழக்கிழமை) சட்டப்பேரவைத் தேர்தலுக்கான வாக்குப்பதிவு நடைபெறவுள்ளது. இதையொட்டி, சென்னை உள்ளிட்ட நகரங்களில் பணிபுரிந்து வரும் வெளிமாவட்டத்தைச் சேர்ந்தவர்கள் வாக்களிக்கத் தங்கள் சொந்த ஊர்களுக்குச் செல்வது வழக்கம். பயணிகளின் வசதிக்காக ஏப்ரல் 21 முதல் அரசு சார்பில் 5,574 சிறப்புப் பேருந்துகள் இயக்கப்படுகின்றன.

இருப்பினும், அரசுப் பேருந்துகளில் இடம் கிடைக்காத பயணிகள் தனியார் ஆம்னி பேருந்துகளை நாடுகின்றனர். இதனைச் சாதகமாகப் பயன்படுத்திக்கொண்டு, ஆம்னி பேருந்து நிறுவனங்கள் வழக்கத்தை விட இரண்டு முதல் மூன்று மடங்கு வரை கூடுதல் கட்டணத்தை நிர்ணயித்துள்ளன.

கட்டண உயர்வு விவரம்: சென்னையிலிருந்து முக்கிய நகரங்களுக்குச் செல்லும் பேருந்துகளின் உத்தேசக் கட்டண உயர்வு பின்வருமாறு:

• திருநெல்வேலி: வழக்கமான கட்டணம் ரூ.1,400-லிருந்து தற்போது ரூ.3,000 வரை அதிகரித்துள்ளது.
• மதுரை: ரூ.1,100-ஆக இருந்த கட்டணம் தற்போது ரூ.2,200 முதல் ரூ.3,500 வரை வசூலிக்கப்படுகிறது.
• தூத்துக்குடி: ரூ.1,700-லிருந்து ரூ.3,200 வரை உயர்ந்துள்ளது.
• திருச்சி: ரூ.1,500-ஆக இருந்த கட்டணம் தற்போது ரூ.2,000 முதல் ரூ.2,600 வரை நிர்ணயிக்கப்பட்டுள்ளது.

எப்.ஐ.ஆர் நகலை நீதிமன்றம் மூலம் பெற்றுக்கொள்ளலாம் உயர்நீதிமன்ற கிளை உத்தரவு

கோவை, சேலம், நாகர்கோவில் உள்ளிட்ட பிற நகரங்களுக்கும் ரூ.500 முதல் ரூ.2,000 வரை கூடுதல் கட்டணம் வசூலிக்கப்படுகிறது. தீபாவளி மற்றும் பொங்கல் பண்டிகை காலங்களைப் போலவே, ஜனநாயகக் கடமையாற்றச் செல்லும் காலத்திலும் இத்தகைய கட்டண உயர்வு செய்யப்பட்டுள்ளது ஏழை மற்றும் நடுத்தர மக்களிடையே கடும் அதிருப்தியை ஏற்படுத்தியுள்ளது.