சாத்தான்குளம் தந்தை – மகன் கொலை வழக்கில், போலீசாருக்கு வழங்கப்பட்ட மரண தண்டனையை உறுதி செய்ய உயர்நீதிமன்றத்தில் சிபிஐ மனு

மதுரை: உலகையே உலுக்கிய சாத்தான்குளம் தந்தை, மகன் கொலை வழக்கில், தண்டனை பெற்ற 9 காவலர்களுக்கும் விதிக்கப்பட்ட மரண தண்டனையை உறுதி செய்ய வேண்டும் என சிபிஐ தரப்பில் சென்னை உயர்நீதிமன்ற மதுரை கிளையில் மனு தாக்கல் செய்யப்பட்டுள்ளது.

வழக்கின் பின்னணி: தூத்துக்குடி மாவட்டம் சாத்தான்குளத்தைச் சேர்ந்த வணிகர் ஜெயராஜ் மற்றும் அவரது மகன் பென்னிக்ஸ் ஆகியோர் கடந்த 2020 ஜூன் மாதம் ஊரடங்கு விதிகளை மீறியதாகக் கூறி காவல்துறையினரால் விசாரணைக்கு அழைத்துச் செல்லப்பட்டனர். விசாரணையின் போது காவலர்களின் கொடூரத் தாக்குதலுக்கு உள்ளான தந்தை மற்றும் மகன் இருவரும் கோவில்பட்டி சிறையில் அடுத்தடுத்து உயிரிழந்தனர்.

நீதிமன்றத் தீர்ப்பு: இந்த வழக்கை விசாரித்த மதுரை முதலாவது கூடுதல் மாவட்ட நீதிமன்றம், கடந்த ஏப்ரல் 6-ஆம் தேதி வரலாற்றுச் சிறப்புமிக்க தீர்ப்பை வழங்கியது. அதில், இது ‘அரிதினும் அரிதான வழக்கு’ என்று குறிப்பிட்ட நீதிபதி, குற்றம் சாட்டப்பட்ட இன்ஸ்பெக்டர் ஸ்ரீதர், சப்-இன்ஸ்பெக்டர்கள் ரகு கணேஷ், பாலகிருஷ்ணன் உள்ளிட்ட 9 காவலர்களுக்கும் மரண தண்டனை விதித்து உத்தரவிட்டார்.

சிபிஐ-யின் தற்போதைய நடவடிக்கை: கீழ் நீதிமன்றம் மரண தண்டனை விதிக்கும் பட்சத்தில், சட்ட நடைமுறைகளின்படி அதனை உயர்நீதிமன்றம் உறுதி செய்ய வேண்டும். இதன்படி, 9 காவலர்களுக்கும் வழங்கப்பட்ட மரண தண்டனையை உறுதி செய்யக் கோரி சிபிஐ தற்போது உயர்நீதிமன்ற மதுரை கிளையில் மனு தாக்கல் செய்துள்ளது. இந்த வழக்கு நீதிபதிகள் ஆனந்த் வெங்கடேஷ், ராமகிருஷ்ணன ஆகியோர் முன்பு இன்று விசாரணைக்கு வந்தது. சிறையில் உள்ள 9 குற்றவாளிகளும் காணொலி காட்சி வாயிலாக ஆஜர்படுத்தப்பட்டனர். குற்றவாளியான முன்னாள் ஆய்வாளர் தர் தானே நேரில் ஆஜராகி வாதாட விரும்புவதாக தெரிவித்தார்.

இதையடுத்து ‘முதலில் மேல்முறையீட்டு மனுவை தாக்கல் செய்யுங்கள்’ என்று நீதிபதிகள் அறிவுறுத்தினர்.  நீதிபதிகள், வழக்கு விசாரணையை வரும் 30ம் தேதி ஒத்தி வைத்தனர்.

அதேசமயம், தங்களுக்கு விதிக்கப்பட்ட தண்டனையை எதிர்த்து காவலர்கள் தரப்பிலும் மேல்முறையீடு செய்ய வாய்ப்புள்ளதாகக் கருதப்படுகிறது. சிபிஐ-யின் இந்த மனு விரைவில் விசாரணைக்கு வரும் என்று எதிர்பார்க்கப்படுகிறது.

சென்னை – நெல்லை இடையே முன்பதிவில்லா மெமு எக்ஸ்பிரஸ் : தெற்கு ரயில்வே அறிவிப்பு