தமிழக அரசுக்கு கடந்த 3 மாதங்களில் ரூ.64,945 கோடி வருவாய் – மத்திய தணிக்கை துறை அறிக்கை வெளியீடு!

சென்னை:

தமிழக அரசுக்கு மாநில சரக்கு மற்றும் சேவை வரி (ஜி.எஸ்.டி.), முத்திரைத்தாள் பதிவு கட்டணம், விற்பனை வரி, ஆயத்தீர்வை வரி மற்றும் மத்திய அரசின் மானியங்கள் உள்ளிட்ட பல்வேறு வழிகளில் வருவாய் கிடைத்து வருகிறது. இந்நிலையில், நடப்பு நிதியாண்டின் முதல் 3 மாதங்களில் (ஏப்ரல் முதல் ஜூன் வரை) தமிழகத்தின் மொத்த வரி வருவாய் ரூ.64,944.97 கோடியாக உயர்ந்துள்ளதாக மத்திய தணிக்கை துறை அறிக்கையின் தற்காலிக புள்ளிவிவரங்கள் மூலம் தெரியவந்துள்ளது.

முந்தைய நிதியாண்டின் இதே காலகட்டத்தில் தமிழக அரசின் மொத்த வருவாய் ரூ.63,755.70 கோடியாக இருந்த நிலையில், தற்போது ரூ.1,189.27 கோடி கூடுதல் வருவாய் கிடைத்துள்ளது. இந்த ஆண்டில் மத்திய அரசின் மானியமும், வரிப் பகிர்வும் சற்று குறைந்தபோதிலும், ஒட்டுமொத்த வருவாய் அதிகரித்துள்ளது குறிப்பிடத்தக்கது.

வருவாய் விவரங்கள்:

நேரடி வரிகள் மூலம்: ரூ.60,061.72 கோடி
வரி அல்லாத இதர வருவாய்: ரூ.3,172 கோடி
மத்திய அரசு மானியம்: ரூ,1,710 கோடி

கடந்த நிதியாண்டின் முதல் மூன்று மாதங்களுடன் ஒப்பிடுகையில், அப்போதைய காலகட்டத்தில் வரிகள் மூலம் ரூ.56,366.76 கோடியும், வரி அல்லாத வருவாயாக ரூ.2,895.70 கோடியும், மத்திய அரசு மானியமாக ரூ.4,493.23 கோடியும் கிடைத்தது குறிப்பிடத்தக்கது.