நெல்லை இரட்டை கொலை வழக்கு: பெண், சிறுவன் உள்பட 11 பேர் இதுவரை கைது – தப்பியோட முயன்ற 2 பேருக்கு கை முறிவு

திருநெல்வேலி: நெல்லை மாவட்டம் வீரவநல்லூர் அருகே தந்தை மற்றும் 5 வயது மகனை காரை மோதி, வெட்டிக்கொலை செய்த வழக்கில் பெண் மற்றும் 17 வயது சிறுவன் உள்பட இதுவரை 11 பேரை காவல்துறை கைது செய்துள்ளது. இந்தச் சோகமான சம்பவத்தில், காவல்துறையினரைக் கண்டு தப்பியோட முயன்ற 2 முக்கிய குற்றவாளிகளுக்குக் கை முறிந்த நிலையில் மருத்துவமனையில் அனுமதிக்கப்பட்டுள்ளனர்.

வழக்கின் பின்னணி: மூலச்சி கிராமத்தைச் சேர்ந்த காளிமுத்து (40) என்பவர் கடந்த ஜூலை 2-ஆம் தேதி மாலை, தனது மகன்கள் சின்னதுரை, ஜெயராஜ் (5) ஆகியோருடன் மோட்டார் சைக்கிளில் சென்று கொண்டிருந்தார். மாதுடையார்குளம் பகுதியில் சென்றபோது, மர்ம கும்பல் ஒன்று இவர்களது பைக் மீது காரை மோதவிட்டது. இதில் 5 வயது சிறுவன் ஜெயராஜ் சம்பவ இடத்திலேயே உயிரிழந்தான். தொடர்ந்து, அக்கும்பல் காளிமுத்துவின் தலையைத் துண்டித்து கொடூரமாகக் கொலை செய்துவிட்டு தப்பியோடியது.

அடுத்தடுத்து சிக்கிய குற்றவாளிகள்: இக்கொலை சம்பவம் குறித்து வீரவநல்லூர் போலீசார் வழக்குப்பதிவு செய்து தனிப்படை அமைத்து தீவிர விசாரணை நடத்தினர். முதற்கட்டமாக மூலச்சி மற்றும் ஊர்காடு பகுதிகளைச் சேர்ந்த மகேந்திரன், கொக்கி குமார், முத்துச்செல்வன், மணிகண்டன், ராஜதுரை, முத்துபட்டன், மகாலிங்கம் ஆகிய 7 பேரை போலீசார் கைது செய்தனர்.

இதனைத் தொடர்ந்து, இந்தச் சதித்திட்டத்தில் தொடர்புடையதாகக் கூறப்படும் விஜயா (37) மற்றும் 17 வயது சிறுவன் ஆகியோரையும் நேற்று போலீசார் கைது செய்தனர்.

தப்பியோட முயன்றபோது கை முறிவு: இவ்வழக்கில் தொடர்புடைய கிருஷ்ணன் (29) என்பவரைப் பிடிக்க போலீசார் நேற்று 80 அடி கால்வாய் பகுதிக்குச் சென்றபோது, போலீசாரைக் கண்டு தப்பியோட முயன்ற அவர் கீழே விழுந்ததில் வலது கையில் எலும்பு முறிவு ஏற்பட்டது.

அதேபோல், இந்த இரட்டை கொலையின் முக்கிய குற்றவாளியான மாடசாமி (36) கொழுந்துமாமலை முருகன் கோவில் பகுதியில் பதுங்கியிருப்பதாகக் கிடைத்த ரகசிய தகவலின் பேரில் தனிப்படை போலீசார் அங்கு விரைந்தனர். அப்போது காவல்துறையினரிடமிருந்து தப்பிக்க ஓடிய மாடசாமி, நிலைதடுமாறி கீழே விழுந்ததில் அவரது கை மற்றும் காலில் பலத்த எலும்பு முறிவு ஏற்பட்டது. காயமடைந்த கிருஷ்ணன் மற்றும் மாடசாமி ஆகிய இருவரும் நெல்லை அரசு மருத்துவமனையில் பலத்த போலீஸ் பாதுகாப்புடன் சிகிச்சைக்காக அனுமதிக்கப்பட்டுள்ளனர்.

இந்த கொடூர இரட்டை கொலை வழக்கில் இதுவரை மொத்தம் 11 பேர் கைது செய்யப்பட்டுள்ள நிலையில், இந்த சம்பவத்தில் தொடர்புடைய மேலும் சிலரை போலீசார் தேடி வருகின்றனர். அசம்பாவிதங்களைத் தவிர்க்க மூலச்சி பகுதியில் பலத்த போலீஸ் பாதுகாப்பு போடப்பட்டுள்ளது.

சென்னை : வாடிக்கையாளர் போல் நடித்து ரூ.53 லட்சம் நகை திருட்டு: 20 முறை கடையில் கைவரிசை: