திருவண்ணாமலை : பிளஸ்-1 மாணவியைக் கடத்தி 8 பேர் கும்பல் கூட்டுப் பாலியல் வன்கொடுமை!

திருவண்ணாமலை: திருவண்ணாமலை மாவட்டம் பிரம்மதேசம் அருகே, விடுமுறைக்கு வந்த பள்ளி மாணவியைக் கடத்தி 8 பேர் கொண்ட கும்பல் கூட்டுப் பாலியல் வன்கொடுமையில் ஈடுபட்ட சம்பவம் அப்பகுதியில் பெரும் பதற்றத்தையும் அதிர்ச்சியையும் ஏற்படுத்தியுள்ளது.

சம்பவம் குறித்துத் தெரியவருவதாவது: காஞ்சிபுரம் மாவட்டத்தைச் சேர்ந்த 16 வயது மாணவி ஒருவர், அங்குள்ள பள்ளியில் 11-ம் வகுப்பு பயின்று வருகிறார். தற்போது பள்ளிகளுக்கு விடுமுறை விடப்பட்டுள்ளதால், திருவண்ணாமலை மாவட்டம் பிரம்மதேசம் அடுத்த கல்பட்டு கிராமத்தில் உள்ள தனது பாட்டி வீட்டிற்குச் சில நாட்களுக்கு முன்பு வந்துள்ளார்.

சம்பவத்தன்று இரவு மாணவி தனியாக இருந்தபோது, அங்கு வந்த அதே பகுதியைச் சேர்ந்த வாலிபர்கள் சிலர் அவரிடம் பேச்சு கொடுத்துள்ளனர். பின்னர், அந்த மாணவியைக் கட்டாயப்படுத்தி மிரட்டி, அருகில் இருந்த ஒரு தோட்டத்திற்குத் தூக்கிச் சென்றுள்ளனர். அங்கு மறைவான இடத்திற்குக் கொண்டு செல்லப்பட்ட மாணவியை, 8 பேர் கொண்ட கும்பல் கொடூரமான முறையில் கூட்டுப் பாலியல் வன்கொடுமை செய்துவிட்டு அங்கிருந்து தப்பிச் சென்றது.

மருத்துவமனையில் அனுமதி: பாதிக்கப்பட்ட மாணவி இரத்தக் காயங்களுடன் வீடு திரும்பி, நடந்த கொடுமை குறித்து உறவினர்களிடம் கூறி அழுதார். இதைக் கேட்டு அதிர்ச்சியடைந்த உறவினர்கள், அவரை உடனடியாக அருகில் உள்ள மருத்துவமனையில் சேர்த்தனர். பின்னர் மாணவியின் உடல்நிலை மோசமடைந்ததால், மேல் சிகிச்சைக்காக காஞ்சிபுரம் அரசு மருத்துவமனைக்கு மாற்றப்பட்டார். அங்கு அவருக்குத் தீவிர சிகிச்சை அளிக்கப்பட்டு வருகிறது.

போலீஸ் விசாரணை: தகவலறிந்து சம்பவ இடத்திற்கு வந்த திருவண்ணாமலை மாவட்ட போலீஸ் சூப்பிரண்டு டாக்டர் சுதாகர், கூடுதல் போலீஸ் சூப்பிரண்டு சதீஷ்குமார் மற்றும் பிரம்மதேசம் போலீசார் தீவிர விசாரணை மேற்கொண்டனர். மாணவி சிகிச்சை பெற்று வரும் மருத்துவமனைக்குச் சென்ற போலீசார், அவரிடம் நேரடியாக வாக்குமூலம் பெற்று குற்றவாளிகள் குறித்த விவரங்களைச் சேகரித்தனர்.

கிராமத்தில் பதற்றம்: இந்தக் கொடூரச் சம்பவத்தால் கல்பட்டு கிராமத்தில் பெரும் பதற்றம் நிலவுகிறது. அசம்பாவிதங்களைத் தவிர்க்க அங்கு பலத்த போலீஸ் பாதுகாப்பு போடப்பட்டுள்ளது. முதற்கட்ட விசாரணையில், அதே பகுதியைச் சேர்ந்த சில இளைஞர்களைச் சந்தேகத்தின் அடிப்படையில் போலீசார் பிடித்து ரகசிய இடத்தில் வைத்து விசாரணை நடத்தி வருகின்றனர்.

ஓட்டுக்கு பணம் தரவில்லை…. சாலை மறியல் செய்த பொள்ளாச்சி மக்கள்!

பாட்டி வீட்டிற்கு வந்த மாணவிக்கு நேர்ந்த இந்தச் சோகம், அப்பகுதி மக்களிடையே பெரும் கொந்தளிப்பை ஏற்படுத்தியுள்ளது. குற்றவாளிகள் மீது கடும் நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.