News Update
இலங்கையில் பெய்து வரும் கனமழையால் வெள்ளப்பெருக்கு ஏற்பட்டு வீடுகள் இடிந்தும், நிலச்சரிவு ஏற்பட்டும் 40 பேர் உயிரிழந்துள்ளனர். 21 பேரை தேடும் பணி தீவிரப்படுத்தப்பட்டுள்ளது.
இலங்கையில் கடந்த 10 நாட்களுக்கு மேலாக கனமழை பெய்து வருகிறது. இதன் காரணமாக அங்குள்ள ஆறுகளில் வெள்ளம் கரைபுரண்டு ஓடுகிறது. இதனால் பல நகரங்கள் வெள்ளக்காடாக மாறின. அப்போது கும்புக்கனை நகர சாலையில் சென்ற ஒரு பேருந்தை வெள்ளம் அடித்துச் சென்றது. அங்கு விரைந்த மீட்பு படையினர் பேருந்தை மீட்டு பயணிகளை பத்திரமாக மீட்டனர். அம்பாறை பகுதியில் கார் வெள்ளத்தில் அடித்துச்செல்லப்பட்டதில் 3 பேர் இறந்தனர்.
இதனைத் தொடர்ந்து அங்கு பயங்கர நிலச்சரிவும் ஏற்பட்டது. இந்த நிலச்சரிவால் ஏராளமான வீடுகள் இடிந்து தரைமட்டமாகின. மேலும் பலர் உயிருடன் மண்ணில் புதையுண்டனர். மீட்பு படையினர் அங்கு சென்றதும் அவர்களை தேடும் பணி நடைபெற்றது. கடந்த 16-ம் தேதி முதல் இன்று வரை 40 பேர் உயிரிழந்துள்ளதாக இடர் முகாமைத்துவ நிலையம் தெரிவித்துள்ளது.
மேலும் பலர் மாயமாகி இருப்பதால் அவர்களைத் தேடும் பணி தொடர்ந்து நடைபெற்று வருகிறது. மொத்தமுள்ள 25 நிர்வாக மாவட்டங்களில் 17 மாவட்டங்கள் கடும் பாதிப்பை சந்தித்துள்ளன. 6.000-க்கும் மேற்பட்ட பொதுமக்கள் வீடு மற்றும் உடமைகளை இழந்துள்ளனர். மேலும் 21 பேர் காணாமல் போயுள்ளதாகவும், 10 பேர் காயமடைந்துள்ளதாகவும் தெரிவிக்கப்பட்டுள்ளது.
இதில், அதிகபட்சமாக பதுளை மாவட்டத்தில் 21 பேர் உயிரிழந்துள்ளதுடன் ஏழு பேர் காணாமல் போயுள்ளதாக அறிவிக்கப்பட்டுள்ளது. நுவரெலியா மாவட்டத்தில் 4 பேரும், அம்பாறை மாவட்டத்தில் 7 பேரும், கேகாலை மாவட்டத்தில் 7 பேரும் உயிரிழந்துள்ளதாக தெரிவிக்கப்பட்டுள்ளது. கனமழையால் 1729 குடும்பங்களைச் சேர்ந்த 5893 பேர் பாதிக்கப்பட்டுள்ளனர். இதில் 148 குடும்பங்களைச் சேர்ந்த 441 பேர் 12 பாதுகாப்பு மையங்களில் தங்க வைக்கப்பட்டுள்ளனர். மேலும் 137 குடும்பங்களைச் சேர்ந்த 477 பேர் உறவினர்களின் வீடுகளில் தங்கியுள்ளதாகவும் இடர் முகாமைத்துவ நிலையம் தெரிவித்துள்ளது.
இதுகுறித்து வானிலை ஆய்வு மையம் கூறுகையில், ” இலங்கையின் தென்கிழக்கு பகுதியில் குறைந்த காற்றழுத்த தாழ்வு நிலை உருவாகி உள்ளது. மட்டக்களப்பின் தென் கிழக்கே 210 கிலோ மீட்டர் தொலைவில் மையம் கொண்டுள்ள இந்த குறைந்த காற்றழுத்த தாழ்வு மண்டலம் வடக்கு நோக்கி நகர்ந்து அடுத்த 12 மணி நேரத்தில் ஆழமான காற்றழுத்த தாழ்வு மண்டலமாக மாற வாய்ப்புள்ளது. எனவே 20 செ.மீட்டருக்கும் அதிகமாக மழை பெய்யும்’ என்று எச்சரித்துள்ளது.
News Update