ரூ.5 கோடி லஞ்சப் புகார் எதிரொலி: லயோலா மணிக்கு நெருக்கடியா? அரசியல் வட்டாரத்தில் பரபரப்பு!

சென்னை:

தமிழ்நாடு இயல், இசை, நாடக மன்றத் தலைவர் பதவியைப் பெற்றுத் தருவதற்காக ரூ.5 கோடி லஞ்சம் கொடுக்க ஒருவர் முன்வந்ததாக பள்ளிக்கல்வித்துறை அமைச்சர் ராஜ்மோகன் தெரிவித்துள்ள கருத்து தமிழக அரசியலில் பெரும் பரபரப்பை ஏற்படுத்தியுள்ளது. இந்த விவகாரத்தில் பாடநூல் மற்றும் கல்விப் பணிகள் கழகத் தலைவர் லயோலா மணியின் பெயரும் இடம்பெற்றுள்ளதால் அவருக்குப் புதிய நெருக்கடி உருவாகியுள்ளதாக அரசியல் வட்டாரங்களில் பேசப்படுகிறது.

தமிழ்நாடு நாள் விழாவையொட்டி சென்னையில் நடைபெற்ற நிகழ்ச்சியில் பேசிய அமைச்சர் ராஜ்மோகன், இயல், இசை, நாடக மன்றத் தலைவர் பதவியைப் பெற்றுத் தருவதற்காக ஒருவர் தன்னிடம் ரூ.5 கோடி வழங்க முன்வந்ததாகக் குறிப்பிட்டார். இந்தத் தகவல் லயோலா மணிக்கும் தெரியும் என்றும், தகுதியற்ற ஒருவருக்கு ரூ.500 கோடி கொடுத்தாலும் பதவி வழங்க முடியாது என்று தான் தெரிவித்ததாகவும் அவர் கூறினார்.

மேலும், இயல், இசை, நாடக மன்றத் தலைவர் பதவி நாட்டுப்புறக் கலைஞர் புஷ்பவனம் குப்புசாமிக்கு எந்தவிதப் பணப் பரிவர்த்தனையும் இன்றி வழங்கப்பட்டதாகவும் அமைச்சர் தெரிவித்தார்.

அமைச்சரின் இந்தப் பேச்சு சமூக வலைதளங்களில் வேகமாகப் பரவி விவாதத்தை ஏற்படுத்தியுள்ளது. ரூ.5 கோடி லஞ்சம் வழங்க முன்வந்த நபர் யார்? அவர் யாருடைய தொடர்பில் இந்தப் பேரத்தை முன்னெடுத்தார்? இந்த விவகாரம் குறித்து ஏன் இதுவரை லஞ்ச ஒழிப்புத் துறையில் புகார் அளிக்கப்படவில்லை? என்ற கேள்விகள் எழுந்துள்ளன.

எதிர்க்கட்சிகள் வலியுறுத்தல்

அமைச்சரின் குற்றச்சாட்டு குறித்து பாஜக தலைமைச் செய்தித் தொடர்பாளர் நாராயணன் திருப்பதி கேள்வி எழுப்பியுள்ளார். லஞ்சம் கொடுக்க முயன்ற நபர் மீதும், இடைத்தரகராகச் செயல்பட்டதாகக் கூறப்படும் லயோலா மணி மீதும் உரிய நடவடிக்கை எடுக்கப்பட வேண்டாமா என்றும் அவர் வலியுறுத்தியுள்ளார்.

அதேபோல், திமுக செய்தித் தொடர்பாளர் சரவணன் அண்ணாதுரையும் இந்த விவகாரத்தில் அமைச்சர் ராஜ்மோகனும் லயோலா மணியும் லஞ்ச ஒழிப்புத் துறையிடம் புகார் அளிக்க வேண்டும் எனக் கோரிக்கை விடுத்துள்ளார். ஊழல் தடுப்புச் சட்டத்தின்படி அரசு ஊழியருக்கு லஞ்சம் வழங்குவதாக வாக்குறுதி அளிப்பதும் குற்றம் என அவர் சுட்டிக்காட்டியுள்ளார்.

லயோலா மணியின் பதவிக்கு சிக்கலா?

அமைச்சர் ராஜ்மோகனின் பேச்சைத் தொடர்ந்து லஞ்சப் பேரத்தில் தொடர்புடையதாகக் கூறப்படும் நபர் யார் என்பது குறித்த கேள்விகள் தீவிரமடைந்துள்ளன. இந்த விவகாரத்தில் விசாரணை நடத்தப்பட வேண்டும் என்ற கோரிக்கைகளும் எழுந்துள்ளன.

எனினும், லஞ்சம் வழங்க முன்வந்ததாகக் கூறப்படும் நபரின் அடையாளம் இதுவரை அதிகாரப்பூர்வமாக வெளியிடப்படவில்லை. லயோலா மணியின் தொடர்பு குறித்த குற்றச்சாட்டுகளும் இதுவரை விசாரணை மூலம் உறுதிப்படுத்தப்படவில்லை.

இந்தச் சர்ச்சை அடுத்தகட்டமாக என்ன திருப்பத்தை ஏற்படுத்தும்? லஞ்ச ஒழிப்புத் துறை விசாரணை மேற்கொள்ளுமா? லயோலா மணியின் பதவிக்கு ஏதேனும் பாதிப்பு ஏற்படுமா? என்ற எதிர்பார்ப்பு தமிழக அரசியல் வட்டாரத்தில் நிலவி வருகிறது.