News Update
பிஹார் மாநில முதலமைச்சராக 10வது முறையாக ஐக்கிய ஜனதா தள கட்சி தலைவர் நிதிஷ் குமார் இன்று (நவம்பர் 20) பதவியேற்கிறார்.
பிஹார் மாநிலத்தில் 243 உறுப்பினர்கள் கொண்ட சட்டமன்றத்திற்கான தேர்தலில் பாஜக, ஜேடியூ தலைமையிலான தேசிய ஜனநாயக கூட்டணி 202 தொகுதிகளைக் கைப்பற்றி பிரம்மாண்ட வெற்றியைப் பெற்றது. இதில் பாஜக 89, ஜேடியூ 85, எல்ஜேபி 19, அவாமி மோர்ச்சா 5 இடங்களில் வென்றன.
இதைத் தொடர்ந்து நடைபெற்ற ஐக்கிய ஜனதா தளம் சட்டமன்ற உறுப்பினர்களின் கூட்டத்தில், சட்டமன்ற கட்சித்தலைவராக நிதிஷ் குமார் ஒருமனதாக தேர்ந்தெடுக்கப்பட்டார். அவரது பெயரை விஜய் சவுத்ரி மற்றும் உமேஷ் குஷ்வாகா ஆகியோர் முன் மொழிந்தனர்.பிஜேந்திர யாதவ் உள்ளிட்டோர் வழிமொழிந்தனர். இதனைத் தொடர்ந்து தேசிய ஜனநாயக கூட்டணியின் சட்டமன்றக்குழு தலைவராக நிதிஷ் குமார் தேர்வு செய்யப்படுவார் என தெரிகிறது.
பிஹார் தலைநகர் பாட்னா காந்தி மைதானத்தில் இன்று நடைபெறும் நிகழ்ச்சியில் 10வது முறையாக முதலமைச்சராக நிதிஷ் குமார் பதவியேற்கிறார். ஆளுநர் ஆரிப் முகமது கான் நிதிஷ் குமாருக்கு பதவிப்பிரமாணம் செய்து வைக்கிறார். இந்த நிகழ்ச்சியில் பிரதமர் நரேந்திர மோடி, மத்திய உள்துறை அமைச்சர் அமித்ஷா மற்றும் தேசிய ஜனநாயகக் கூட்டணி கட்சிகளின் தலைவர்கள் பங்கேற்க உள்ளனர்.
இதற்கிடையே பாஜக சட்டமன்ற உறுப்பினர்களின் கூட்டமும் நேற்று நடந்தது. இதில் கட்சியின் சட்டமன்றக்குழு தலைவராக சாம்ராட் சவுத்ரி தேர்வு செய்யப்பட்டார். துணைத்தலைவராக விஜய் குமார் சின்கா தேர்வானார். சாம்ராட் சவுத்ரி, முந்தைய ஆட்சியில் துணை முதலமைச்சராக பதவி வகித்தவர் என்பது குறிப்பிடத்தக்கது.
News Update