சென்னையில் இன்று 7 இடங்களில் ஆர்எஸ்எஸ் பேரணி – போலீஸ் பாதுகாப்பு தீவிரம்!

சென்னை | அக்டோபர் 25, 2026

சென்னையில் இன்று (அக்டோபர் 25) ஏழு இடங்களில் ராஷ்ட்ரீய ஸ்வயம்சேவக் சங்கம் (ஆர்எஸ்எஸ்) சார்பில் அணிவகுப்பு பேரணி நடைபெற உள்ளது. சென்னை உயர் நீதிமன்றத்தின் அனுமதியைத் தொடர்ந்து நடைபெறும் இந்தப் பேரணிகளையொட்டி காவல்துறையினர் பாதுகாப்பு ஏற்பாடுகளை மேற்கொண்டுள்ளனர்.

ஆர்எஸ்எஸ் அமைப்பின் நிறுவன நாள் மற்றும் நூற்றாண்டு நிறைவையொட்டி, தமிழகம் முழுவதும் 128 இடங்களில் அணிவகுப்பு பேரணிகளை நடத்த அந்த அமைப்பு திட்டமிட்டுள்ளது. இதற்காக காவல்துறையிடம் அனுமதி கோரப்பட்ட நிலையில், அனுமதி வழங்குவதில் ஏற்பட்ட சிக்கலைத் தொடர்ந்து சென்னை உயர் நீதிமன்றத்தில் வழக்கு தொடரப்பட்டது.

திருப்பூர் அருகே டெங்கு காய்ச்சலுக்கு 4 வயது சிறுவன் பலி – பெற்றோர் கதறல்!

இந்த வழக்கை விசாரித்த நீதிமன்றம், அக்டோபர் 25 மற்றும் நவம்பர் 1 ஆகிய தேதிகளில் தமிழகத்தின் பல்வேறு பகுதிகளில் பேரணிகளை நடத்த அனுமதி வழங்க உத்தரவிட்டது. மேலும், பேரணியின்போது ஏற்கெனவே வகுக்கப்பட்டுள்ள விதிமுறைகளைக் கண்டிப்பாகப் பின்பற்ற வேண்டும் என்றும் அறிவுறுத்தியது.

சென்னையில் எந்தெந்த இடங்களில் பேரணி?

இதன்படி, சென்னையில் திருவொற்றியூர், கொளத்தூர், எழும்பூர், கொரட்டூர், அய்யப்பன்தாங்கல், மேடவாக்கம் மற்றும் குரோம்பேட்டை ஆகிய ஏழு பகுதிகளில் இன்று ஆர்எஸ்எஸ் அணிவகுப்பு நடைபெற உள்ளது.

எழும்பூரில் உள்ள ரமடா ஹோட்டல் அருகே மாலை 4 மணிக்கு தொடங்கும் அணிவகுப்பு, ராஜரத்தினம் மைதானம் அருகே நிறைவடைய உள்ளது. அதனைத் தொடர்ந்து பொதுக்கூட்டமும் நடைபெற உள்ளது.

அதேபோல், கொளத்தூர் பெரவள்ளூர் காமராஜர் சிலை அருகே மாலை 3 மணிக்கு அணிவகுப்பு தொடங்கும் எனத் தெரிவிக்கப்பட்டுள்ளது.

பாதுகாப்பு ஏற்பாடுகள் தீவிரம்

பேரணிகள் நடைபெறும் பகுதிகளில் சட்டம்-ஒழுங்கைப் பராமரிக்கவும், பொதுமக்களுக்கு இடையூறு ஏற்படாமல் இருக்கவும் காவல்துறையினர் பாதுகாப்பு நடவடிக்கைகளை மேற்கொண்டுள்ளனர்.

பேரணி நடைபெறும் வழித்தடங்களில் போக்குவரத்து மற்றும் பொதுமக்களின் பாதுகாப்பு தொடர்பான முன்னெச்சரிக்கை நடவடிக்கைகளுக்கும் முக்கியத்துவம் அளிக்கப்பட்டுள்ளது.

நீதிமன்றம் விதித்துள்ள நிபந்தனைகளுக்கு உட்பட்டு அணிவகுப்புகளை நடத்த வேண்டியுள்ள நிலையில், சென்னையில் இன்று நடைபெறும் ஆர்எஸ்எஸ் பேரணிகள் கவனம் பெற்றுள்ளன.