தவெக ஆட்சியை கவிழ்க்க பேரம்: சென்னை போலீஸ் சம்மன் – இன்று விசாரணைக்கு ஆஜராகிறாரா செந்தில் பாலாஜி?

சென்னை: தமிழகத்தில் முதலமைச்சர் விஜய் தலைமையிலான த.வெ.க. (தமிழக வெற்றிக் கழகம்) ஆட்சியை கவிழ்க்க எம்.எல்.ஏ.க்களிடம் குதிரை பேரம் பேசப்பட்டதாக எழுந்துள்ள புகாரில், முன்னாள் அமைச்சர் செந்தில் பாலாஜி இன்று போலீஸ் விசாரணைக்கு ஆஜராவாரா என்ற பரபரப்பு ஏற்பட்டுள்ளது.

ரூ.35 கோடி பேரம் – எம்.எல்.ஏ புகார்: கிருஷ்ணகிரி மாவட்டம் ஊத்தங்கரை தொகுதி த.வெ.க. எம்.எல்.ஏ. டாக்டர் இளையராஜா, தன்னிடம் த.வெ.க. ஆட்சியை கவிழ்ப்பதற்காக ரூ.35 கோடி பேரம் பேசப்பட்டதாக சென்னை போலீஸ் கமிஷனர் அமல்ராஜிடம் அண்மையில் அதிரடி புகார் ஒன்றை அளித்தார். த.வெ.க. எம்.எல்.ஏ.க்களை விலைக்கு வாங்க ஒட்டுமொத்தமாக ரூ.180 கோடி அளவில் சதித்திட்டம் தீட்டப்பட்டதாக இந்த புகாரின் பேரில் நடத்தப்பட்ட முதற்கட்ட விசாரணையில் தெரியவந்துள்ளது.

9 பேர் கைது – வாக்குமூலம்: இந்த குதிரை பேரம் தொடர்பாக, தேர்தல் கருத்துக்கணிப்பு நிறுவனத்தின் நிறுவனர் திருநாவுக்கரசு, அ.தி.மு.க. பிரமுகர் சீனிவாசன் மற்றும் தி.மு.க. பிரமுகர்கள் உள்ளிட்ட 8 பேரை தனிப்படை போலீசார் ஏற்கனவே அடுத்தடுத்து கைது செய்திருந்த நிலையில், தற்போது கைதானவர்களின் எண்ணிக்கை 9 ஆக உயர்ந்துள்ளது. கைதானவர்கள் அளித்த வாக்குமூலத்தில், முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் ஆகியோரது தூண்டுதலின் பேரிலேயே இந்த பேரம் நடத்தப்பட்டதாக தெரிவித்துள்ளதாக கூறப்படுகிறது. இதைத்தொடர்ந்து போலீசார் தங்களை கைது செய்யக்கூடும் என்பதால் இருவரும் தலைமறைவாகினர்.

இன்று ஆஜராக சம்மன்: தலைமறைவாக உள்ள செந்தில் பாலாஜி மற்றும் அவரது சகோதரர் அசோக்குமாருக்கு சென்னை திருவல்லிக்கேணி போலீசார் விசாரணைக்கு ஆஜராகக் கோரி சம்மன் அனுப்பியுள்ளனர். அதன்படி, இன்று (திங்கட்கிழமை) காலை 10.30 மணியளவில் திருவல்லிக்கேணி காவல் நிலையத்தில் இருவரும் நேரில் ஆஜராக வேண்டும் என உத்தரவிடப்பட்டுள்ளது.

விமான நிலையங்களில் ‘லுக் அவுட்’ நோட்டீஸ்: செந்தில் பாலாஜியும் அவரது சகோதரரும் வெளிநாடுகளுக்கு தப்பிச் செல்வதைத் தடுக்கும் பொருட்டு, நாட்டின் அனைத்து முக்கிய விமான நிலையங்களுக்கும் திருவல்லிக்கேணி போலீசார் ‘லுக் அவுட்’ (Look-out) நோட்டீஸ் அனுப்பியுள்ளனர். இதனால் விமான நிலையங்களில் கண்காணிப்பு பலப்படுத்தப்பட்டுள்ளது.

இன்றைய சம்மன் உத்தரவின்படி செந்தில் பாலாஜி விசாரணைக்கு ஆஜராவாரா அல்லது சம்மனை புறக்கணிப்பாரா என்ற எதிர்பார்ப்பு அரசியல் வட்டாரத்தில் பெரும் பரபரப்பை ஏற்படுத்தியுள்ளது. ஒருவேளை அவர்கள் இன்று ஆஜராகத் தவறினால், போலீசார் அடுத்தகட்டமாக கைது உள்ளிட்ட தீவிர நடவடிக்கைகளில் இறங்குவார்கள் எனத் தெரிகிறது.

திருப்பூர்: அழகிகள் நிர்வாண ஆட்டம்: தவெக நிர்வாகி பாருக்கு சீல்…