மதுரை: ஓடும் ரெயிலில் இருந்து தவறி விழுந்து வாலிபர் பரிதாப பலி!

மதுரை: மதுரை அருகே ஓடும் ரெயிலின் படிக்கட்டில் அமர்ந்து பயணித்த வாலிபர் ஒருவர், நிலைதடுமாறி கீழே விழுந்து சம்பவ இடத்திலேயே பரிதாபமாக உயிரிழந்தார்.

இதுகுறித்து போலீஸ் தரப்பில் கூறப்படுவதாவது:

மதுரை மாவட்டம் சோழவந்தான் நெடுங்குளம் ரெயில்வே கேட் அருகே வாலிபர் ஒருவர் ரெயிலில் அடிபட்ட நிலையில் சடலமாகக் கிடப்பதாக மதுரை ரெயில்வே போலீசாருக்கு தகவல் கிடைத்தது. அந்த தகவலின் பேரில், ரெயில்வே போலீஸ் சப்-இன்ஸ்பெக்டர் சீனிவாசன் தலைமையிலான போலீசார் சம்பவ இடத்திற்கு விரைந்து வந்தனர். உயிரிழந்த வாலிபரின் உடலைக் கைப்பற்றிய போலீசார், பிரேத பரிசோதனைக்காக மதுரை அரசு ராஜாஜி மருத்துவமனைக்கு அனுப்பி வைத்தனர்.

ஊர் திருவிழாவிற்கு சென்றபோது நேர்ந்த விபரீதம்: இதனைத் தொடர்ந்து போலீசார் நடத்திய முதற்கட்ட விசாரணையில், உயிரிழந்த வாலிபர் தென்காசி மாவட்டம் குருவங்கோட்டை கிராமத்தைச் சேர்ந்த சுதர்சன் என்பது தெரியவந்தது. இவர் சென்னையில் இருந்து நெல்லை நோக்கிச் சென்ற விரைவு ரெயிலில் (Express Train) தனது உறவினருடன் பயணித்துள்ளார். குருவங்கோட்டை கிராமத்தில் நடைபெற உள்ள ஊர் திருவிழாவில் கலந்து கொள்வதற்காக அவர் சொந்த ஊருக்குத் திரும்பியுள்ளார்.

அப்போது, ரெயில் பெட்டியின் படிக்கட்டில் அமர்ந்து சுதர்சன் ஆபத்தான முறையில் பயணம் செய்துள்ளார். ரெயில் சோழவந்தான் அருகே சென்றபோது, எதிர்பாராதவிதமாக அவர் படிக்கட்டில் இருந்து நிலைதடுமாறி கீழே விழுந்து, ரெயிலில் அடிபட்டு சம்பவ இடத்திலேயே உயிரிழந்தது தெரியவந்துள்ளது.

இச்சம்பவம் குறித்து மதுரை ரெயில்வே போலீசார் வழக்குப்பதிவு செய்து மேலும் தீவிர விசாரணை மேற்கொண்டு வருகின்றனர். ஊர் திருவிழாவிற்குச் சென்ற வாலிபர் ரெயிலில் இருந்து விழுந்து உயிரிழந்த சம்பவம் அவரது குடும்பத்தினரிடையே பெரும் சோகத்தை ஏற்படுத்தியுள்ளது.

முதல்வர் நிவாரண நிதிக்கு ரூ.1.6 கோடி வழங்கிய.. மதுரை யாசகர்!