மீண்டும் எம்பி ஆக போகும் அன்புமணி – தடுக்க, தந்தை ராமதாஸின் நடவடிக்கை முறியடிப்பு..!

மாநிலங்களவை தேர்தலில் போட்டியிட அன்புமணி தாக்கல் செய்த வேட்பு மனு ஏற்றுக் கொள்ளப்பட்டது.

தமிழகத்தில் 2026ஆம் ஆண்டு நடைபெறவுள்ள மாநிலங்களவை தேர்தலுக்கான வேட்புமனுத் தாக்கல் விறுவிறுப்பாக நடைபெற்று வருகிறது. இதில் பாட்டாளி மக்கள் கட்சியின் தலைவர் அன்புமணி ராமதாஸ் மீண்டும் வேட்பாளராகக் களம் இறங்கியுள்ளார்.

​வேட்புமனுத் தாக்கல்

​அன்புமணி ராமதாஸ் நேற்று சென்னை தலைமைச் செயலகத்தில் உள்ள சட்டப்பேரவை செயலகத்தில் தனது வேட்புமனுவைத் தாக்கல் செய்தார். இந்த நிகழ்வின் போது அதிமுகவின் முக்கிய தலைவர்களான கே.பி. முனுசாமி, நத்தம் விஸ்வநாதன் மற்றும் தங்கமணி ஆகியோர் உடனிருந்தனர்.

​கூட்டணிக் கணக்கு

​தற்போது அதிமுக தலைமையிலான கூட்டணியில் பாமக இடம்பெற்றுள்ளது.

• ​அதிமுக ஒதுக்கீடு: அதிமுக பொதுச்செயலாளர் எடப்பாடி பழனிசாமி, தனது கட்சிக்குக் கிடைக்கக்கூடிய இடங்களில் ஒன்றை அதன் கூட்டணிக் கட்சியான பாமகவிற்கு ஒதுக்கினார்.
• ​இதன் அடிப்படையில், அதிமுக சார்பில் முன்னாள் தம்பிதுரை ஒரு இடத்திற்கும், பாமக சார்பில் அன்புமணி ராமதாஸ் ஒரு இடத்திற்கும் வேட்பாளர்களாக அறிவிக்கப்பட்டனர்.

அரசியல் பரபரப்பு

​அன்புமணி ராமதாஸ் வேட்புமனுத் தாக்கல் செய்த அதே வேளையில், பாமக நிறுவனர் ராமதாஸின் உதவியாளர் சுவாமிநாதன் என்பவரும் வேட்புமனுத் தாக்கல் செய்துள்ளார். கடந்த ஆண்டு பாமகவில் ஏற்பட்ட உட்கட்சிப் பூசல் காரணமாக அன்புமணி கட்சியில் இருந்து நீக்கப்பட்டதாகக் கூறி, அவருக்கு எதிராக இந்த மனுத் தாக்கல் செய்யப்பட்டுள்ளது. இதனால் இன்று  நடைபெறவுள்ள வேட்புமனு பரிசீலனையில் இது குறித்து முக்கிய முடிவு எடுக்கப்படும் என்று எதிர்பார்க்கப்படுகிறது.

இருப்பினும், தேர்தல் அதிகாரிகள் அன்புமணியின் வேட்புமனு ஏற்கப்படுவதாக அறிவித்தனர். மேலும் தம்பிதுரையின் வேட்புமனுவும் ஏற்கப்பட்டுள்ளது.