வாச்சாத்தி துயர சம்பவம் – பொய் சொன்னாரா செங்கோட்டையன்? மறைக்கப்பட்டது என்ன?

1992ம் ஆண்டு, அதிமுக ஆட்சியில் ஜெயலலிதா அவர்கள் முதல்வராக இருந்தபோது, அப்போதைய வனத்துறை அமைச்சராக இருந்த செங்கோட்டையன் செய்த செயல் சமூக வலைத்தளங்களில் மீண்டும் பேசுபொருளாக மாறியுள்ளது.

வாச்சாத்தி சம்பவம்

வாச்சாத்தி சம்பவம் என்பது தமிழ்நாட்டில் தருமபுரி மாவட்டம் வாச்சாத்தி கிராமத்தில் 1992ஆம் ஆண்டு ஜூன் மாதம் நடந்த ஒரு மிகக் கொடூரமான மனித உரிமை மீறல் சம்பவம்.

​வாச்சாத்தி துயரத்தின் பின்னணி!

சந்தன மரக்கடத்தல் தொடர்பாக விசாரணை என்ற பெயரில், வனத்துறையினர், காவல்துறையினர், மற்றும் வருவாய்த்துறையினர் உள்ளடக்கிய 269 பேர் வாச்சாத்தி பழங்குடி கிராம மக்கள் மீது கொடூரமான தாக்குதல் நடத்தினர் என்று குற்றஞ்சாட்டப்படுகிறது.
​கிராம மக்களின் வீடுகள் அடித்து நொறுக்கப்பட்டு, அவர்களின் உடைமைகள் சூறையாடப்பட்டன.
பல பெண்கள் பாலியல் வன்கொடுமைக்கு உட்படுத்தப்பட்டனர்.

சிறுமிகள், கர்ப்பிணிகள் பாதிப்பு

இவர்களில் 18 வயதுக்கு உட்பட்ட சிறுமிகளுக்கும், கர்ப்பிணிகளும் அடங்குவர். பல பெண்கள் மானபங்கம் செய்யப்பட்ட சம்பவம் தமிழகம் முழுவதும் பெரும் பரபரப்பை ஏற்படுத்தியது.
பாதிக்கப்பட்ட 150க்கும் மேற்பட்டவர்கள் மீதே பொய் வழக்குகள் பதிவு செய்யப்பட்டு, அவர்கள் கைது செய்யப்பட்டனர்.

நீண்ட சட்டப் போராட்டம்

இந்திய மார்க்சிஸ்ட் கம்யூனிஸ்ட் கட்சி மற்றும் தமிழ்நாடு மலைவாழ் மக்கள் சங்கம் ஆகியவை வாச்சாத்தி கிராம மக்களுக்கு நீதி கேட்டு சட்டப் போராட்டத்தைத் தொடங்கின. சென்னை உயர்நீதிமன்றம் – உச்ச நீதிமன்றம் வரை வழக்கு தொடரப்பட்டது.

வாச்சாத்தி சம்பவம் நடைபெற்ற போது முதல்வராக இருந்தவர் ஜெயலலிதா. அப்போதைய வனத்துறை அமைச்சரான செங்கோட்டையன் வாச்சாத்தி பகுதியில் பழங்குடி மக்களுக்கு எந்தவித அநீதியும் நடக்கவில்லை என்று சட்டமன்றம் உட்பட பல இடங்களில் வாதாடினார். அங்கு எந்த ஒரு பெண்ணுக்கும் பாலியல் ரீதியாக துன்புறுத்தப்படவில்லை என்றே சொல்லிக் கொண்டு இருந்தார்.

சொன்னது பொய் என நிரூபணம்

ஆனால், பல ஆண்டுகளுக்கு மேல் நீடித்த போராட்டத்திற்குப் பிறகு, தருமபுரி மாவட்ட முதன்மை அமர்வு நீதிமன்றம், குற்றம் சாட்டப்பட்ட 269 பேரும் குற்றவாளிகள் என்று வரலாற்றுச் சிறப்புமிக்க தீர்ப்பை வழங்கியது. அதிமுக முன்னாள் அமைச்சர் செங்கோட்டையன் சொன்ன பொய் என்பது ஆணித்தரமாக நிரூபணமானது.

​வாச்சாத்தி சம்பவம், இந்தியாவிலேயே பழங்குடி மக்கள் மீது அதிகாரிகள் பலரால் நிகழ்த்தப்பட்ட கொடூரமான வன்கொடுமைச் சம்பவங்களில் ஒன்றாகப் பார்க்கப்படுகிறது. சுமார் 31 ஆண்டுகள் நடந்த நீண்ட சட்டப் போராட்டத்திற்குப் பிறகே பாதிக்கப்பட்ட மக்களுக்கு நீதி கிடைத்தது என்பது குறிப்பிடத்தக்கது.

யோக்கியவரா இந்ந செங்கோட்டையன்?

வாச்சாத்தி வன்கொடுமை நிகழ்வில் குற்றத்தை மறைத்து குற்றவாளிகளுக்கு ஆதரவாக நடந்த அன்றைய அதிமுக அரசின் வனத்துறை அமைச்சர் செங்கோட்டையன்.

பாதிக்கப்பட்ட மக்கள் மீது குற்றம் சுமத்தியவர். சிபிஐ விசாரணைக்கு பின் உண்மையாக சந்தன மரம் கடத்தியது அதிகாரிகள் தான் என்றும் தங்களுடைய கடத்தல் பழியை பழங்குடி மக்கள் மீது சுமத்த திட்டமிட்ட நாடகம் தான் வாச்சாத்தி மக்கள் மீதான தாக்குதலும், வன்கொடுமையும் என்பது அம்பலமானது.

பெரும் துயரம்

வாச்சாத்தி வழக்கில் இந்திய வரலாற்றிலேயே அரசுத்தரப்பினர் 269 பேர் குற்றவாளிகள் என்று தீர்ப்பளிக்கப்பட்டதோடு உயிரோடு இருந்த 215 பேருக்கு தண்டனையும் கிடைக்கப்பெற்றது இந்த வழக்கில்தான் என்பது குறிப்பிடத்தக்கது.

வாச்சாச்சி சம்பவம் மீண்டும் பரபரப்பாக பேசப்படுவதற்கு காரணம், அதிமுகவிலிருந்து நீக்கப்பட்ட செங்கோட்டையன் தனது சட்டமன்ற உறுப்பினர் பதவியை ராஜினாமா செய்து விட்டு, விஜய்யின் தவெக கட்சியில் இணைந்தார்.

இணைந்த அவருக்கு தலைமை பொறுப்பும் வழங்கப்பட்டுள்ளது.  அவர் எப்படிப்பட்டவர்? என்று சமூக வலைத்தளங்களில் வாச்சாத்தி சம்பவம் பற்றி பேசப்பட்டு வருவதாக அரசியல் வட்டாரத்தில் கூறப்படுகிறது.