திருவண்ணாமலையில் கொடியேற்றத்துடன் தொடங்கியது கார்த்திகை தீபத் திருவிழா!

திருவண்ணாமலை அருணாசலேஸ்வரர் கோயிலில் கார்த்திகை தீபத் திருவிழா கொடியேற்றத்துடன் இன்று தொடங்கியது.

நினைத்தாலே முக்தி தரும் தலமான திருவண்ணாமலை சிவபெருமானின் பஞ்ச பூத தலங்களில் அக்னி தலமாக விளங்குகிறது. இங்குள்ள அண்ணாமலையார் கோயிலில் பல்வேறு திருவிழாக்கள் நடைபெற்றாலும் கார்த்திகை தீபத்திருவிழாவே உலகப் புகழ்பெற்றது. இங்கு கார்த்திகை தீபத்திருவிழா இன்று காலை கொடியேற்றத்துடன் தொடங்கியது.

இதனை முன்னிட்டு விநாயகர், முருகர், அருணாசலேஸ்வரர், உண்ணாமலை அம்மன், சண்டிகேஸ்வரர் ஆகிய பஞ்ச மூர்த்திகளுக்கு சிறப்பு அபிஷேக, ஆராதனை இன்று அதிகாலை நடைபெற்றது. அதனைத் தொடர்ந்து அருணாசலேஸ்வரர் கோயில் சாமி சன்னதி முன்பு பஞ்ச மூர்த்திகள் அலங்கார ரூபத்தில் எழுந்தருள, சிவாச்சாரியார்கள் வேத மந்திரங்கள் முழங்க, பக்தர்கள் அரோகரா கோஷம் எழுப்ப இன்று காலை 6.30 மணிக்கு தங்க கொடி மரத்தில் கொடியேற்றப்பட்டது.

இந்த நிகழ்வில் தமிழ்நாடு துணை சபாநாயகர் கு.பிச்சாண்டி, மாவட்ட ஆட்சியர் தர்ப்பகராஜ், மாவட்ட காவல் கண்காணிப்பாளர் டாக்டர் சுதாகர் அண்ணாமலையார் கோயில் தக்கார் டாக்டர் மீனாட்சி சுந்தரம், உள்பட சுமார் 10,000 மேற்பட்ட பக்தர்கள் கலந்து கொண்டனர். இன்று தொடங்கிய கார்த்திகை தீபத்திருவிழா 10 நாட்களுக்கு நடைபெறும். காலை மற்றும் இரவு நேரங்களில் பஞ்ச மூர்த்திகள் கோயில் மாட வீதியில் வலம் வந்து பக்தர்களுக்கு அருள்பாலிப்பர். நவம்பர் 29-ம் தேதி இரவு வெள்ளித் தேரோட்டமும், நவம்பர் 30-ம் தேதி மகா தேரோட்டமும் நடைபெறும்.

கார்த்திகை தீபத் திருவிழாவின் உச்ச நிகழ்ச்சியான தீப தரிசன விழா டிசம்பர் 3-ம் தேதி நடைபெறுகிறது. அன்று அதிகாலை 4 மணிக்கு அருணாசலேஸ்வரர் கோயில் பரணி தீபமும், மாலை 6 மணிக்கு ஆண்டுக்கு ஒருமுறை மட்டுமே காட்சி தரும் அர்த்தநாரீஸ்வரர் அண்ணாமலையார் கோயில் தங்க கொடிமரம் முன்பு எழுந்தருளி ஆனந்த தாண்டவம் ஆட இங்குள்ள 2,668 அடி உயர மலையின் உச்சியில் மகா தீபம் ஏற்றப்படும். சிவ பெருமானே ஜோதி வடிவாகக் காட்சி தருவதாக நம்பப்படுகிறது.

இந்த நிகழ்வில் தமிழ்நாடு முழுவதும் இருந்து பல லட்சக்கணக்கான பக்தர்கள் திரள்வார்கள் என்று எதிர்பார்க்கப்படுகிறது. இதற்காக பக்தர்களுக்கு தேவையான அடிப்படை வசதிகள் மாவட்ட நிர்வாகம் சார்பில் மேற்கொள்ளப்பட்டு வருகிறது.