21 வயதுக்கு கீழ் மது கிடையாது; வயது சந்தேகமிருந்தால் ஆதார் கட்டாயம்… 

தமிழகத்தில் சட்டம்-ஒழுங்கைப் பாதுகாக்கவும், இளைய தலைமுறையினரை மதுப் பழக்கத்திலிருந்து மீட்கவும் தமிழ்நாடு அரசு அடுத்தடுத்து அதிரடி நடவடிக்கைகளை எடுத்து வருகிறது. முதலமைச்சர் விஜய் அவர்களின் உத்தரவின்படி, வழிபாட்டுத் தலங்கள் மற்றும் கல்வி நிறுவனங்களுக்கு அருகில் உள்ள டாஸ்மாக் கடைகள் மூடப்பட்டு வரும் நிலையில், தற்போது 21 வயதுக்கு உட்பட்ட நபர்களுக்கு டாஸ்மாக் கடைகளில் மதுபானங்களை விற்கக் கூடாது என்று தமிழ்நாடு அரசு மிகக் கடுமையான உத்தரவைப் பிறப்பித்துள்ளது. வயதில் சந்தேகம் ஏற்படும் பட்சத்தில், வாடிக்கையாளர்களின் அடையாள அட்டைகளைச் சரிபார்த்த பின்னரே மது வழங்க வேண்டும் என்றும் அறிவுறுத்தப்பட்டுள்ளது.

கடந்த மே 14-ஆம் தேதி வெளியான அறிவிப்பின்படி, பொதுமக்கள் மற்றும் மாணவர்களின் நலனைக் கருத்தில் கொண்டு, கல்வி நிறுவனங்கள், வழிபாட்டுத் தலங்கள் மற்றும் பேருந்து நிலையங்கள் ஆகியவற்றின் அருகாமையில் அமைந்துள்ள டாஸ்மாக் கடைகளை உடனடியாக மூடுமாறு முதலமைச்சர் விஜய் உத்தரவிட்டிருந்தார். இரண்டு வார காலக்கெடுவிற்குள் இந்த உத்தரவைச் செயல்படுத்துமாறு அதிகாரிகளுக்கு அறிவுறுத்தப்பட்டது.

அதன்படி, தமிழகத்தின் 5 முக்கிய மண்டலங்களில் கண்டறியப்பட்ட மொத்தம் 717 டாஸ்மாக் கடைகளை மூடுவதற்கான நடவடிக்கைகள் போர்க்கால அடிப்படையில் எடுக்கப்பட்டன. முதலமைச்சரின் இந்த மக்கள் நலன் சார்ந்த முடிவுக்கு அரசியல் தலைவர்கள், சமூக ஆர்வலர்கள் மற்றும் பொதுமக்கள், குறிப்பாகப் பெண்கள் தரப்பில் இருந்து பெரும் வரவேற்பும் வாழ்த்துகளும் குவிந்தன.

கடைகள் மூடப்பட்டதைத் தொடர்ந்து, மது ஒழிப்பு மற்றும் ஒழுங்குமுறை நடவடிக்கையின் அடுத்த கட்டமாக இன்றைய தினம் தமிழ்நாடு அரசு மற்றுமொரு அதிரடி சுற்றறிக்கையை வெளியிட்டுள்ளது. அதன்படி, டாஸ்மாக் சில்லரை விற்பனைக் கடைகளில் 21 வயதுக்கு உட்பட்ட இளைஞர்களுக்கு எந்தவொரு காரணத்தைக் கொண்டும் மதுபானங்களை விற்பனை செய்யக் கூடாது என்று தடை விதிக்கப்பட்டுள்ளது.

இது குறித்து டாஸ்மாக் பணியாளர்களுக்கு அனுப்பப்பட்டுள்ள அதிகாரப்பூர்வ அறிவுறுத்தலில் பின்வருமாறு குறிப்பிடப்பட்டுள்ளது:

“தமிழ்நாடு மதுபான சில்லரை விற்பனை விதிகள் 2003, விதி 11ஏ-இன் படி (Tamil Nadu Liquor Retail Vending Rules 2003, Rule 11A), 21 வயது பூர்த்தியடையாத நபர்களுக்கு மதுபானங்களை விற்பனை செய்வது சட்டப்படி குற்றமாகும். இந்த விதியை அனைத்து டாஸ்மாக் கடைகளும் மிகக் கண்டிப்பாகப் பின்பற்ற வேண்டும்.”

டாஸ்மாக் கடைகளுக்கு வரும் வாடிக்கையாளர்களின் வயதில் ஏதேனும் சந்தேகம் ஏற்பட்டால், பணியாளர்கள் உடனடியாக அவர்களின் வயது மற்றும் அடையாளத்தை உறுதி செய்ய வேண்டும். இதற்காக வாடிக்கையாளர்களின் ஓட்டுநர் உரிமம் (Driving License) அல்லது இதர அங்கீகரிக்கப்பட்ட அரசு அடையாள அட்டைகளை (Government ID) ஆய்வு செய்த பிறகே மதுபானங்களை விற்பனை செய்ய வேண்டும் என்று உத்தரவிடப்பட்டுள்ளது.

இந்த உத்தரவை மீறி, 21 வயதுக்கு உட்பட்ட சிறுவர்களுக்கோ அல்லது இளைஞர்களுக்கோ மது விற்பனை செய்வது கண்டறியப்பட்டால், சம்பந்தப்பட்ட டாஸ்மாக் கடைப் பணியாளர்கள் மீது கடுமையான துறை ரீதியான மற்றும் சட்ட ரீதியான நடவடிக்கைகள் பாயும் என்று தமிழ்நாடு அரசு எச்சரித்துள்ளது.

அரசின் இந்த அடுத்தடுத்த அதிரடி உத்தரவுகள், தமிழகத்தில் மதுப் பயன்பாட்டைக் குறைப்பதிலும், இளம் வயதினர் மதுப் பழக்கத்திற்கு அடிமையாவதைத் தடுப்பதிலும் மிக முக்கிய மைல்கல்லாகப் பார்க்கப்படுகிறது

திருச்சியில் போதை ஊசி செலுத்திய இளம்பெண் பலி: சிக்கிய காதலன், நண்பர்…