Jio News Tamilமதுரை மாவட்டம், திருமங்கலம் – தென்காசி நான்கு வழிச் சாலைத் திட்டப் பணிகளுக்காக, மதுரை திரளி கண்மாயிலிருந்து மண் எடுக்க வழங்கப்பட்ட அனுமதியில் பெரும் விதிமீறல்கள் நடப்பதாகப் புகார்கள் எழுந்துள்ளன.
இந்நிலையில், நேற்று கனிமவளத்துறை அதிகாரிகள் திடீரென அந்தப் பகுதிக்கு நேரில் சென்று ஆய்வு நடத்தியது பெரும் பரபரப்பை ஏற்படுத்தியுள்ளது.
புரிந்துணர்வு ஒப்பந்தத்தில் விரிசல்?
நான்கு வழிச் சாலை போன்ற முக்கியத் திட்டங்களுக்காக மண் எடுக்க அனுமதி வழங்கப்படும்போது, ஒப்பந்த நிறுவனத்திற்கும் அதிகாரிகளுக்கும் இடையே சில “நிபந்தனையற்ற இணக்கங்கள்” இருப்பது வழக்கம். ஆனால், திரளி கண்மாய் விவகாரத்தில் அந்த இணக்கமான சூழலில் விரிசல் விழுந்துள்ளதாகத் தெரிகிறது.
சமூக ஆர்வலர்களின் தொடர் புகார்களால் நெருக்கடிக்குள்ளாகியுள்ள அதிகாரிகள், ஒப்பந்த நிறுவனம் தங்களுக்குச் சரியான முறையில் “ஒத்துழைப்பு” வழங்கவில்லை என்ற கடும் அதிருப்தியில் இருப்பதாகக் கூறப்படுகிறது.
அலுவலகத் தடை: கசியும் தகவல்கள்!
நேற்று கண்மாய் பகுதிக்குச் சென்ற அதிகாரிகள், சாலைப் பணி ஒப்பந்த நிறுவனப் பிரதிநிதிகளிடம் மிகக் காட்டமாகப் பேசியதாக கூறப்படுகிறது. குறிப்பாக, “அனுமதி பெற்றுத் தந்தும், நடைமுறைகளை முறையாகப் பின்பற்றத் தவறியதால், இனி நாளை முதல் அலுவலகத்தின் பக்கம் வர வேண்டாம்” என எச்சரித்துவிட்டுச் சென்றதாகக் கிராம மக்கள் மற்றும் அங்கிருந்த ஊழியர்கள் மத்தியில் தகவல்கள் கசிகின்றன.
ஆய்வா? அல்லது அதிருப்தியா?
நான்கு வழிச் சாலைப் பணிக்காக 1 மீட்டர் ஆழத்திற்கு மண் எடுக்க அனுமதி பெற்றுவிட்டு, சுமார் 4 மீட்டர் ஆழத்திற்குச் சுரண்டப்பட்டுள்ளதாகச் சான்றுகளுடன் புகார்கள் எழுந்துள்ளன. இந்நேரத்தில், அதிகாரிகள் காட்டும் இந்த ‘திடீர் கடுமை’ சட்டவிதிமுறைகளை நிலைநாட்டவா? அல்லது தங்களுக்குள் ஏற்பட்ட “பகிர்வு” குறித்த மனக்கசப்பா? எனச் சமூக ஆர்வலர்கள் கேள்வி எழுப்புகின்றனர்.
சாலைத் திட்டப் பணிகளின் பெயரில் நீர்நிலைகள் சிதைக்கப்படுவது உறுதியாகியும், இதுவரை மௌனம் காத்து வந்த நிர்வாகம், இப்போது திடீரென காட்டும் இந்த ‘கடுமை’ திரளி கண்மாயைக் காப்பாற்றுமா அல்லது ஒரு “சமரசம்” நோக்கிய நகர்வா என்பதைப் பொறுத்திருந்துதான் பார்க்க வேண்டும்.
கருத்துகளை கூறலாம்
இச்செய்தி திரளி கண்மாய் பகுதியில் நிலவும் சூழல் மற்றும் அங்குள்ள மக்களின் நேரடித் தகவல்களின் அடிப்படையில் தொகுக்கப்பட்டுள்ளது. இது குறித்து சம்பந்தப்பட்ட அரசுத் துறையினரோ..! அல்லது ஒப்பந்த நிறுவனமோ..! விளக்கம் அளிக்க முன்வந்தால், அவர்களது கருத்துக்களையும் உரிய ஆதாரங்களுடன் வெளியிடத் தயாராக உள்ளோம்.
