இந்தியர்களுக்கு எதிராக அதிகரிக்கும் இனவெறி:

சிட்டி ஹால் முன்பாக கூடிய வெள்ளை இன மேலாதிக்கவாதிகள் குழு ஒன்று, ‘இந்தியாவுக்கே திரும்பிப் போங்கள், டெக்சாஸை இந்துக்கள் கைப்பற்றுவதை நிறுத்துங்கள், எங்களை உங்களால் இடமாற்றம் செய்ய முடியாது’ என்று கூறியுள்ளது என்றார்.

அமெரிக்காவில் இந்தியர்களுக்கு எதிரான இனவெறி (வெறுப்புணர்வு) சம்பவங்கள் அதிகரித்து வருவது குறித்து காங்கிரஸ் உறுப்பினர் ராஜா கிருஷ்ணமூர்த்தி கவலை தெரிவித்துள்ளார். மேலும், இனவாதம் தவறான எண்ணம் மற்றும் பாகுபாடுகளுக்கு எதிராக அமெரிக்கர்கள் ஒன்றிணைய வேண்டும் என்றும் அவர் வலியுறுத்தியுள்ளார்.

இலினாய்ஸ் மாகாணத்தைச் சேர்ந்த இந்த ஜனநாயகக் கட்சி நாடாளுமன்ற உறுப்பினரான அவர், இது குறித்து தனது சமூக ஊடகப் பதிவு ஒன்றில்,  டெக்சாஸ் மாகாணத்தின் ஃபிரிஸ்கோ (Frisco) பகுதியில் நடந்த ஒரு சம்பவத்தைக் குறிப்பிட்டுள்ளார். அங்கு வெள்ளை இன மேலாதிக்கவாதிகள் குழு ஒன்று, இந்தியர்களுக்கு எதிரான கோஷங்களை எழுப்பியதுடன், சிட்டி ஹால் முன்பாக இந்தியக் கொடியைக் கிழித்ததாகவும் கூறப்படுகிறது.

இதுகுறித்து கிருஷ்ணமூர்த்தி கூறுகையில், “அமெரிக்காவில் இந்தியர்களுக்கு எதிரான இனவெறி (வெறுப்புணர்வு) அதிகரித்து வருவது குறித்து நான் எச்சரிக்க விரும்புகிறேன். சில வாரங்களுக்கு முன்பு, டெக்சாஸின் ஃபிரிஸ்கோவில் உள்ள சிட்டி ஹால் முன்பாக கூடிய வெள்ளை இன மேலாதிக்கவாதிகள் குழு ஒன்று, ‘இந்தியாவுக்கே திரும்பிப் போங்கள், டெக்சாஸை இந்துக்கள் கைப்பற்றுவதை நிறுத்துங்கள், எங்களை உங்களால் இடமாற்றம் செய்ய முடியாது’ என்று கூறியுள்ளது என்றார்.

அது இந்துக்கள், முஸ்லிம்கள், யூதர்கள் என யாரை நோக்கி இருந்தாலும் எனக்கு கவலையில்லை; உங்கள் மதம் எதுவாக இருந்தாலும், தேசிய இனம் எதுவாக இருந்தாலும் சரி. எவருக்கு எதிராக நடக்கும் இனவாதம், தவறான எண்ணம் மற்றும் பாகுபாடுகளுக்கு எதிராகவும் நாம் தோளோடு தோள் நின்று எதிர்க்க வேண்டும். இந்த விவகாரத்தில் நீங்கள் கவனம் செலுத்துவீர்கள் என்று நம்புகிறேன்,” என இந்திய வம்சாவளி அமெரிக்க நாடாளுமன்ற உறுப்பினரான அவர் தெரிவித்தார்.

கடந்த மே மாதம், இந்திய மற்றும் சீன வம்சாவளி அமெரிக்கர்களை இலக்கு வைத்து அதிபர் டொனால்ட் டிரம்ப் பரப்பிய “இனவெறி உரையாடல்களை” கண்டித்து, கிருஷ்ணமூர்த்தி மற்றும் பிற ஜனநாயகக் கட்சி நாடாளுமன்ற உறுப்பினர்கள் அமெரிக்க நாடாளுமன்றத்தில் ஒரு தீர்மானத்தைக் கொண்டு வந்தனர். கிருஷ்ணமூர்த்தி, காங்கிரஸ் உறுப்பினர் டெட் லியூ மற்றும் காங்கிரஸ் பெண் உறுப்பினர் பிரமிளா ஜெயபால் ஆகியோரால் கொண்டு வரப்பட்ட இந்தத் தீர்மானம், பிறப்புரிமை குடியுரிமையை விமர்சித்து வானொலி தொகுப்பாளர் மைக்கேல் சாவேஜ் பதிவிட்டிருந்த ஒரு கருத்தை ட்ரூத் சோஷியல் தளத்தில் டிரம்ப் பகிர்ந்ததை விமர்சித்தது.

ட்ரம்ப் பகிர்ந்த அந்த பதிவில், “இந்தியா மற்றும் சீனா குறித்து இழிவான வார்த்தைகளைப் பயன்படுத்தியதுடன், குடியேறியவர்களின் விசுவாசத்தைக் கேள்விக்குள்ளாக்கியது. மேலும், இந்திய அமெரிக்கர்கள் மற்றும் சீன அமெரிக்கர்களை இலக்காகக் கொண்டு தீங்கு விளைவிக்கும் ஒரே மாதிரியான எதிர்மறை கருத்துக்களை பரப்பியது” என்று கூறப்பட்டுள்ளது. இந்தத் தீர்மானத்திற்கு காங்கிரஸ் பெண் உறுப்பினர்கள் கிரேஸ் மெங், ஜூடி சூ ஆகியோருடன் காங்கிரஸ் உறுப்பினர்கள் ஸ்ரீ தானேதார், சுஹாஸ் சுப்பிரமணியம் மற்றும் அமி பேரா ஆகியோரும் ஆதரவு தெரிவித்தனர்.

கடந்த ஏப்ரல் 22 அன்று, ‘தி சாவேஜ் நேஷன்’ வானொலி நிகழ்ச்சியின் சில பகுதிகளை டிரம்ப் பகிர்ந்திருந்தார். அதில் தீவிர பழமைவாத வர்ணனையாளரான மைக்கேல் சாவேஜ்: “இங்கு பிறக்கும் ஒரு குழந்தை உடனடியாக குடிமகனாக மாறிவிடுகிறது, பின்னர் அவர்கள் சீனா, இந்தியா அல்லது கிரகத்தின் வேறு ஏதேனும் ஒரு நரகக் குழியிலிருந்து (hellhole) தங்கள் ஒட்டுமொத்த குடும்பத்தையும் இங்கு அழைத்து வருகிறார்கள்” என்று கூறியிருந்தார்.

கலெக்டர் முகாம் அலுவலகத்தில் ரீல்ஸ்: வடமாநில தொழிலாளி மீது நடவடிக்கை…