மதுரை: தமிழகத்தில் தவெக ஆட்சியைக் கவிழ்க்க திமுகவும் அதிமுகவும் இணைந்து செயல்படுவதாக தவெக சட்டமன்ற உறுப்பினர் முஸ்தபா பகிரங்கமாகக் குற்றம்சாட்டியுள்ளார். மேலும், ஆட்சிக்கு எதிராக வாக்களிக்கக் கோரி தன்னிடமே ரூ.30 கோடி வரை பேரம் பேசப்பட்டதாக அவர் தெரிவித்திருப்பது அரசியல் வட்டாரத்தில் பரபரப்பை ஏற்படுத்தியுள்ளது.
மதுரை விமான நிலையத்தில் இன்று செய்தியாளர்களைச் சந்தித்த தவெக எம்.எல்.ஏ. முஸ்தபா, திமுகவும் அதிமுகவும் இணைந்து தவெக அரசுக்கு எதிராகச் செயல்படுவதாகக் கூறினார்.
தவெக தேர்தலில் வெற்றி பெற்று ஆட்சியைப் பிடிக்கும் என்று எதிர்பார்க்காத திமுக, அதிமுக ஆகிய கட்சிகள், தற்போது மக்கள் ஆதரவுடன் அமைந்துள்ள அரசின் செயல்பாடுகளை முடக்க முயற்சிப்பதாக அவர் குற்றம்சாட்டினார்.
மேலும், சட்டமன்ற உறுப்பினர்களை விலைக்கு வாங்கும் முயற்சியாக குதிரை பேரம் நடைபெறுவதாகவும், இதுதொடர்பாகத் தன்னையும் சிலர் தொலைபேசியில் தொடர்புகொண்டதாகவும் முஸ்தபா தெரிவித்தார்.
தவெக அரசுக்கு எதிராக சட்டமன்றத்தில் நம்பிக்கையில்லாத் தீர்மானம் கொண்டுவரும்போது அதற்கு ஆதரவாக வாக்களிக்க வேண்டும் என்றும், அதற்காக முதலில் ரூ.15 கோடி வழங்கப்படும் என்றும், பின்னர் மேலும் ரூ.15 கோடி வழங்கப்படும் என்றும் மொத்தம் ரூ.30 கோடிக்கு பேரம் பேசப்பட்டதாக அவர் கூறினார்.
இந்த விவகாரம் தொடர்பாக கட்சித் தலைமையிடம் ஏற்கெனவே தெரிவித்துள்ளதாகவும் அவர் குறிப்பிட்டார்.
மேலும், மதுரையைச் சேர்ந்த அதிமுகவின் மூத்த நிர்வாகி ஒருவர் தன்னைத் தொடர்புகொண்டதாகவும், தவெக சட்டமன்ற உறுப்பினர்களை விலைக்கு வாங்கும் முயற்சியில் திமுகவும் அதிமுகவும் ஈடுபட்டுள்ளதாகவும் முஸ்தபா குற்றம்சாட்டினார்.
எவ்வளவு பெரிய தொகை கொடுத்தாலும் தவெக எம்.எல்.ஏ.க்கள் கட்சி மாற மாட்டார்கள் என்றும், இந்த விவகாரத்தில் தொடர்புடையவர்கள் யார் என்பது இன்னும் ஓரிரு நாட்களில் வெளிச்சத்திற்கு வரும் என்றும் அவர் தெரிவித்தார்.
தேர்தலில் 35 கட்சிகளுடன் கூட்டணி அமைத்துப் போட்டியிட்ட திமுகவையும், கூட்டணியின்றி தனித்துப் போட்டியிட்டு 35 சதவீத வாக்குகளைப் பெற்று ஆட்சியைப் பிடித்த தவெகவையும் ஒப்பிட்டுப் பேசிய அவர், மக்கள் அளித்த தீர்ப்பைச் சிலர் சீர்குலைக்க முயற்சிப்பதாகக் கூறினார்.
தவெக ஆட்சியைக் கவிழ்க்க திமுக – அதிமுக இணைந்து குதிரை பேரத்தில் ஈடுபடுவதாக முஸ்தபா முன்வைத்துள்ள இந்தக் குற்றச்சாட்டுகள் தமிழக அரசியல் களத்தில் புதிய விவாதத்தை ஏற்படுத்தியுள்ளன.
More Stories
சில்லறை கொடுக்காததால் தகராறு! ஓடும் பேருந்தில் இருந்து பெண் நடத்துநர் கீழே தள்ளப்பட்டு உயிரிழப்பு!
BSNL ஓய்வூதியதாரர்கள் கவனத்திற்கு! ஆயுள் சான்றிதழ் சமர்ப்பிக்க சிறப்பு முகாம் – மாவட்ட வாரியான தேதிகள் அறிவிப்பு
தமிழகத்தில் குப்பை சேகரிப்புப் பணியில் அதிரடி மாற்றம்! தனியார் நிறுவனங்களிடம் ஒப்படைக்க அரசு திட்டம்?