ரூ.20,000 கடனுக்காக தாய், சேய் உயிரிழப்பதா? – கொத்தடிமை முறையை ஒழிக்க வேல்முருகன் ஆவேசக் கோரிக்கை!

சென்னை:

காஞ்சிபுரம் அருகே உரிய நேரத்தில் மருத்துவ உதவி கிடைக்காமல் பழங்குடியின கர்ப்பிணிப் பெண்ணும், பச்சிளம் குழந்தையும் உயிரிழந்த சம்பவம் பெரும் அதிர்ச்சியை ஏற்படுத்தியுள்ள நிலையில், “மனித உயிரை விட ரூ.20 ஆயிரம் கடன் பெரிதா?” என தமிழக வாழ்வுரிமைக் கட்சியின் தலைவர் தி. வேல்முருகன் கண்டனம் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில் கூறப்பட்டுள்ளதாவது:

காஞ்சிபுரம் மாவட்டம் சிங்காடிவாக்கத்தில், விறகு வியாபாரி ஒருவரிடம் ரூ.20,000 முன்பணம் பெற்று வேலை செய்து வந்த இருளர் பழங்குடியினத்தைச் சேர்ந்த தேன்மொழி என்ற நிறைமாத கர்ப்பிணிக்கு பிரசவ வலி ஏற்பட்டுள்ளது. அப்போது, வாங்கிய முன்பணத்தை திருப்பித் தராமல் மருத்துவமனைக்குச் செல்லக் கூடாது எனக் கூறி தடுத்து நிறுத்தியதன் காரணமாக, உரிய சிகிச்சை கிடைக்காமல் தாய் மற்றும் பச்சிளம் குழந்தை இருவரும் பரிதாபமாக உயிரிழந்துள்ளனர்.

இந்தச் செயல் சட்டவிரோதமான மறைமுகக் கொத்தடிமை முறையின் கொடூர அடையாளமாகும். ஒரு மனித உயிரை விட முன்பணமாகக் கொடுத்த பணம் பெரிதாகிவிட்டதா என்று கேள்வி எழுப்பியுள்ள அவர், தமிழ்நாடு அரசு இதில் தலையிட்டு உரிய நீதி வழங்க வேண்டும் என வலியுறுத்தியுள்ளார்.

அரசிற்கு முன்வைக்கப்பட்ட முக்கியக் கோரிக்கைகள்:

• வழக்குப் பதிவு & கைது: இந்தச் சம்பவத்தை வெறும் சந்தேக மரணமாகக் கருதாமல், கொத்தடிமைத் தொழிலாளர் ஒழிப்புச் சட்டம், வன்கொடுமைத் தடுப்புச் சட்டம் மற்றும் கொலைப் பிரிவுகளின் கீழ் வழக்குப்பதிவு செய்து குற்றவாளிகளை உடனடியாகக் கைது செய்ய வேண்டும்.
• சிறப்புக் குழு ஆய்வு: காஞ்சிபுரம், திருவள்ளூர், ராணிப்பேட்டை, வேலூர் உள்ளிட்ட மாவட்டங்களில் உள்ள விறகுக் கிடங்குகள், கரி மூட்டங்கள் மற்றும் செங்கல் சூளைகளில் பழங்குடியின மக்கள் கொத்தடிமைகளாக நடத்தப்படுகிறார்களா என்பதை ஆய்வு செய்ய சிறப்புக் குழு அமைக்கப்பட வேண்டும்.
• நிவாரணம் & மறுவாழ்வு: பாதிக்கப்பட்ட குடும்பத்திற்கு உடனடி நிவாரண நிதி, இலவச வீட்டு மனை, பாதுகாப்பான குடியிருப்பு, வாழ்வாதார உதவிகள் மற்றும் கல்வி, வேலைவாய்ப்புகளை அரசு உறுதி செய்ய வேண்டும்.

உயிரிழந்த தேன்மொழிக்கும், பச்சிளம் குழந்தைக்கும் தமிழக வாழ்வுரிமைக் கட்சியின் சார்பில் ஆழ்ந்த இரங்கலையும் வீரவணக்கத்தையும் தெரிவிப்பதாக அவர் குறிப்பிட்டுள்ளார்.