சென்னை, ஜூலை 17: தமிழக அரசியலில் பரபரப்பை ஏற்படுத்தியுள்ள தவெக எம்எல்ஏ பேரம் பேச்சு வழக்கு தொடர்பாக, பிரபல தனியார் தொலைக்காட்சியின் மூத்த பத்திரிகையாளரிடம் போலீஸார் தொடர்ந்து 2-வது நாளாக விசாரணை நடத்தினர். மேலும், சைபர் தடயவியல் ஆய்வுக்காக அவரது செல்போனும் பறிமுதல் செய்யப்பட்டுள்ளதாக தகவல் வெளியாகியுள்ளது.
ஊத்தங்கரை தொகுதி தவெக எம்எல்ஏ இளையராஜா அளித்த புகாரின் பேரில் இந்த வழக்கு பதிவு செய்யப்பட்டது. தனது கட்சியின் ஆட்சியை கவிழ்க்கும் நோக்கில் தன்னிடம் ரூ.35 கோடி வரை பேரம் பேசப்பட்டதாக அவர் குற்றம்சாட்டியிருந்தார். இந்த புகாரைத் தொடர்ந்து, சென்னை அரும்பாக்கத்தைச் சேர்ந்த யூடியூபர் திருநாவுக்கரசு உள்ளிட்ட சிலரை திருவல்லிக்கேணி போலீஸார் கைது செய்து விசாரணை மேற்கொண்டு வருகின்றனர்.
வழக்கு தொடர்பான ஆவணங்கள் மற்றும் மின்னணு ஆதாரங்களை ஆய்வு செய்தபோது, சம்பவம் நடைபெற்றதாக கூறப்படும் காலகட்டத்தில் யூடியூபர் திருநாவுக்கரசு மற்றும் ஒரு மூத்த பத்திரிகையாளர் இடையே அடிக்கடி தொடர்பு இருந்ததாக போலீஸாருக்கு தகவல்கள் கிடைத்ததாக கூறப்படுகிறது. குறிப்பாக, இருவருக்கும் இடையே குறுஞ்செய்தி பரிமாற்றங்கள் மற்றும் தொலைபேசி தொடர்புகள் இருந்ததாக விசாரணையில் தெரியவந்துள்ளதாக தகவல்கள் தெரிவிக்கின்றன.
இதையடுத்து, சம்பந்தப்பட்ட பத்திரிகையாளருக்கு போலீஸார் சம்மன் அனுப்பி நேரில் ஆஜராக உத்தரவிட்டனர். முதல் நாளில் பல மணி நேரம் விசாரணை நடத்தப்பட்ட நிலையில், நேற்று 2-வது நாளாகவும் அவரிடம் விசாரணை மேற்கொள்ளப்பட்டது. விசாரணையின் போது கிடைத்த தகவல்களை உறுதிப்படுத்தும் வகையில், அவரது செல்போன் தடயவியல் ஆய்வுக்காக போலீஸாரால் கைப்பற்றப்பட்டது.
இந்நிலையில், இந்த வழக்கு அரசியல் மற்றும் ஊடக வட்டாரங்களில் பெரும் கவனத்தை ஈர்த்துள்ளது. விசாரணை தொடர்ந்து நடைபெற்று வரும் நிலையில், மேலும் சில முக்கிய நபர்களிடம் விசாரணை நடத்தப்படலாம் என கூறப்படுகிறது. இந்த வழக்கின் அடுத்த கட்ட முன்னேற்றம் குறித்து அரசியல் வட்டாரங்கள் உன்னிப்பாக கவனித்து வருகின்றன.
More Stories
தமிழகத்தில் காலியாக உள்ள தொகுதிகளுக்கு இடைத்தேர்தல் எப்போது? தேர்தல் ஆணையர் பதில்
தமிழகம் முழுவதும் 40-க்கும் மேற்பட்ட தாலுகா அலுவலகங்களில் லஞ்ச ஒழிப்பு சோதனை: ஜி-பே மூலம் ரூ.1 கோடிக்கு மேல் பரிவர்த்தனை கண்டுபிடிப்பு
டாஸ்மாக் கடைகளில் 54 புதிய பிராண்ட் மது வகைகளை விரைவில் அறிமுகப்படுத்த முடிவு