தமிழகத்தில் தாமரையை பூக்க வைத்து வெற்றி விழாவுக்கு பிரதமரை அழைப்போம்: சாத்தூரில் அண்ணாமலை அதிரடி பேச்சு!

சாத்தூர்: “தமிழகத்தில் தாமரையை பூக்க வைத்து, அதற்கான வெற்றி விழாவுக்குப் பிரதமர் மோடியை அழைப்போம்” என விருதுநகர் மாவட்டம் சாத்தூரில் நடைபெற்ற தேர்தல் பிரச்சாரக் கூட்டத்தில் பா.ஜ.க. முன்னாள் மாநிலத் தலைவர் அண்ணாமலை ஆவேசமாகப் பேசினார்.

​விருதுநகர் மாவட்டம் சாத்தூர் சட்டமன்றத் தொகுதியில் தேசிய ஜனநாயகக் கூட்டணி சார்பில் போட்டியிடும் பா.ஜ.க. வேட்பாளர் நயினார் நாகேந்திரனை ஆதரித்து, சாத்தூர் அருகே உள்ள டி.என்.சி. முக்குரோட்டில் பிரம்மாண்டப் பிரச்சாரப் பொதுக்கூட்டம் நடைபெற்றது. முன்னதாக, அண்ணாமலை மற்றும் வேட்பாளர் நயினார் நாகேந்திரன் ஆகியோர் அங்குள்ள தேவர் சிலைக்கு மாலை அணிவித்து மரியாதை செலுத்தினர்.

​சாத்தூர் முன்னேற்றமே ஒற்றைக் குறிக்கோள்

​கூட்டத்தில் தொண்டர்களிடையே உரையாற்றிய அண்ணாமலை பேசியதாவது:

“சாத்தூர் தொகுதியை முன்னேற்ற வேண்டும் என்ற ஒற்றைக் குறிக்கோளோடு நயினார் நாகேந்திரன் இங்குப் போட்டியிடுகிறார். மத்திய அரசுடன் நேரடித் தொடர்பு கொண்டவர் என்பதால், சாத்தூருக்குத் தேவையான அனைத்துத் திட்டங்களையும் அவரால் எளிதாகக் கொண்டு வர முடியும். ஏற்கனவே திருநெல்வேலியில் அமைச்சராகவும், சட்டமன்ற உறுப்பினராகவும் இருந்து பல்வேறு சாதனைகளைப் புரிந்தவர். அவரது அனுபவம் இந்தத் தொகுதிக்கு மிகப்பெரிய பலமாக அமையும்.”

​திமுக அரசு மீது கடும் சாடல்

​தமிழகத்தில் தற்போது திமுக அரசுக்கு எதிராகப் பலத்த அலை வீசுவதாகக் குறிப்பிட்ட அவர், சட்ட ஒழுங்கு குறித்துக் கடுமையான புள்ளிவிவரங்களை முன்வைத்தார்:

• ​கடந்த 5 ஆண்டுகால திமுக ஆட்சியில் 8,008 கொலைகள் நடந்துள்ளன.
• ​2,080 பாலியல் வழக்குகள் பதிவாகியுள்ளன.
• ​3 வயதுக் குழந்தை முதல் 63 வயது மூதாட்டி வரை யாருக்கும் பாதுகாப்பற்ற சூழல் நிலவுகிறது.
• ​மகளிருக்கு மாதம் 1,000 ரூபாய் தருவதாகக் கூறிவிட்டு, 28 மாதங்களாக வழங்காமல் ஏமாற்றியுள்ளனர்.

​கூட்டணி அரசியல் குறித்து விமர்சனம்

​”தொகுதிப் பங்கீட்டில் விசிக, கம்யூனிஸ்ட் போன்ற கட்சிகளுக்குச் சீட்கள் குறைக்கப்பட்டுள்ளன. ஆனால், உறுப்பினர்களே இல்லாத காங்கிரஸ் கட்சிக்கு அதிக இடங்களை ஒதுக்கி, திமுக அக்கட்சிக்கு அடிமையாகச் செயல்பட்டு வருகிறது. வடமாநிலங்களில் கரைந்து வரும் காங்கிரஸைத் தமிழகத்தில் திமுக தாங்கிப் பிடிக்கிறது” என்று விமர்சித்தார்.

​தொழில் மற்றும் விவசாயப் பிரச்சினைகள்

​விருதுநகர் மாவட்டத்தின் முக்கிய வாழ்வாதாரமான பட்டாசுத் தொழில் சிக்கல்களை நயினார் நாகேந்திரன் தீர்த்து வைப்பார் என உறுதி அளித்த அண்ணாமலை, செண்பகவள்ளி அணைத் திட்டத்தைச் செயல்படுத்தத் தவறிய ஸ்டாலின் அரசைக் கண்டித்தார். மேலும், ஆலங்குளம் சிமெண்ட் ஆலையை நவீனப்படுத்தாமல் இளைஞர்களின் வேலைவாய்ப்பைத் திமுக அரசு முடக்கியுள்ளதாகவும், இப்பிரச்சினைக்கு பாஜக தீர்வு காணும் என்றும் உறுதியளித்தார்.

​இக்கூட்டத்தில் அதிமுக கிழக்கு மாவட்டச் செயலாளர் ரவிச்சந்திரன், அமமுக மாவட்டச் செயலாளர் சந்தோஷ்குமார், பாஜக ராஜா பாண்டுரங்கன் உள்ளிட்ட கூட்டணிக் கட்சி நிர்வாகிகள் மற்றும் திரளான தொண்டர்கள் கலந்து கொண்டனர்.