News Update
தமிழ்நாடு மற்றும் புதுச்சேரியைச் சேர்ந்த 35 மீனவர்களை இலங்கை கடற்படை கைது செய்துள்ளது பெரும் பரபரப்பை ஏற்படுத்தியுள்ளது.
இலங்கை கடற்படையினரின் தொடர் அட்டூழியம் காரணமாக தமிழக மீனவர்கள் கடலில் மீன்பிடிக்கச் செல்லவே அச்சப்படும் நிலை ஏற்பட்டுள்ளது. எல்லை தாண்டியதாக இலங்கை கடற்படையால் தமிழக மீனவர்கள் கைது செய்யப்படுவது ஒருபுறம் என்றால், இலங்கை கடற்கொள்ளையர்கள் தமிழக மீனவர்களை தாக்கி கொள்ளையடிப்பது மறுபுறம் தொடர்கதையாகி உள்ளது.
இந்த நிலையில் தமிழ்நாடு மற்றும் புதுச்சேரியைச் சேர்ந்த மீனவர்கள் 35 பேரை இலங்கை கடற்படை இன்று (நவம்பர் 3) கைது செய்துள்ளது. அவர்களிடமிருந்து 3 விசைப்படகுகள், ஒரு நாட்டுப் படகு ஆகியவற்றையும் இலங்கை கடற்படை பறிமுதல் செய்துள்ளது. அத்துடன் நாட்டு படகில் இருந்த 4 மீனவர்கள், மூன்று விசைப்படகுகளில் இருந்த 31 மீனவர்கள் என 35 பேரை கைது செய்து காங்கேசன் கடற்படை முகாமிற்கு கொண்டு சென்றுள்ளது.
ராமேஸ்வரத்தில் இருந்து நேற்று முன்தினம் நானூறுக்கும் மேற்பட்ட விசைப்படகுகளில் 2 ஆயிரத்திற்கும் அதிகமான மீனவர்கள் மீன்பிடிக்கச் சென்றனர். ஆனால், அவர்களை மீன்பிடிக்க விடாமல் இலங்கை கடற்படையினர் துப்பாக்கி முனையில் விரட்டி அடித்தனர். இதனால் ராமேஸ்வரம் மீனவர்கள் நேற்று குறைந்த அளவிலான மீன்களுடன் கரைக்கு திரும்பினர். இந்த நிலையில், தமிழ்நாடு மற்றும் புதுச்சேரியைச் சேர்ந்த 35 மீனவர்கள் இலங்கை கடற்படையினரால் இன்று கைது செய்யப்பட்டு பெரும் கொந்தளிப்பை ஏற்படுத்தியுள்ளது.
