பட்டாசு இல்லா தீபாவளியை கொண்டாடும் கிராமங்களுக்கு தமிழக அரசு சிறப்புத் திட்டம்! பசுமையை அதிகரிக்க அதிரடி நடவடிக்கை

சென்னை:

சுற்றுச்சூழல் பாதுகாப்பிற்கும், பறவைகள் மற்றும் வன உயிரினங்களின் நலனுக்கும் முக்கியத்துவம் அளித்து பட்டாசு வெடிக்காமல் தீபாவளியைக் கொண்டாடும் கிராமங்களுக்கு தமிழக அரசு சார்பில் சிறப்பு நடவடிக்கைகள் மேற்கொள்ளப்பட உள்ளன.

தமிழகத்தில் சுற்றுச்சூழல் பாதுகாப்பை முன்னிறுத்தி, பல்வேறு கிராம மக்கள் பல ஆண்டுகளாக பட்டாசுகளைத் தவிர்த்து அமைதியான முறையில் தீபாவளிப் பண்டிகையைக் கொண்டாடி வருகின்றனர்.

அந்த வகையில், சிவகங்கை மாவட்டத்தில் வேட்டங்குடிப்பட்டி, கொல்லுக்குடிப்பட்டி, ஈரோடு மாவட்டத்தில் வ.மேட்டுப்பாளையம், செல்லப்பம்பாளையம், தச்சன்கரைவளி, செம்மாண்டம்பாளையம், மீனாட்சிபுரம், புங்கம்பாடி, கருக்கங்காட்டுவலசு ஆகிய கிராமங்கள் குறிப்பிடத்தக்கவை.

மேலும், செங்கல்பட்டு மாவட்டத்தின் வேடந்தாங்கல், திருநெல்வேலி மாவட்டத்தின் கூந்தன்குளம், மயிலாடுதுறை மாவட்டத்தின் பெரம்பூர் உள்ளிட்ட கிராமங்களும் பட்டாசுகளைத் தவிர்த்து தீபாவளியைக் கொண்டாடி வருகின்றன.

கிராமங்களுக்கு கிடைக்கும் புதிய வசதிகள்!

இந்தக் கிராம மக்களின் சுற்றுச்சூழல் பாதுகாப்புப் பங்களிப்பைப் பாராட்டும் வகையில், தமிழ்நாடு மாசு கட்டுப்பாட்டு வாரியம் மூலம் பல்வேறு நடவடிக்கைகள் மேற்கொள்ளப்பட உள்ளதாக சுற்றுச்சூழல் மற்றும் காலநிலை மாற்றத்துறை அமைச்சர் வே.க. ராஜீவ் தெரிவித்துள்ளார்.

இதன்படி, சம்பந்தப்பட்ட கிராமங்களில் பசுமைப் பரப்பை அதிகரித்தல், நாட்டு மர வகைகளை நடவு செய்து வளர்த்தல், சூரிய மின்சக்தி தகடுகளை நிறுவுதல் உள்ளிட்ட பணிகளுக்கான நடவடிக்கைகள் மேற்கொள்ளப்படும் என தெரிவிக்கப்பட்டுள்ளது.

பிளாஸ்டிக் தடுப்பு நடவடிக்கையிலும் அதிரடி!

இதற்கிடையே, ஒருமுறை பயன்படுத்தும் நெகிழிப் பொருட்களுக்கு எதிரான நடவடிக்கைகள் குறித்தும் அமைச்சர் தகவல் வெளியிட்டுள்ளார்.

கடந்த ஐந்து மாதங்களில் மேற்கொள்ளப்பட்ட நடவடிக்கைகளின்படி:

• 776 டன் தடை செய்யப்பட்ட ஒருமுறை பயன்படுத்தும் நெகிழிப் பொருட்கள் பறிமுதல் செய்யப்பட்டுள்ளன.
• விதிமீறல்களுக்காக ரூ.1.89 கோடி அபராதம் விதிக்கப்பட்டுள்ளது.
• தடை செய்யப்பட்ட நெகிழிப் பொருட்களை உற்பத்தி செய்த 11 ஆலைகள் மூடப்பட்டுள்ளன.
• நெகிழிப் பொருட்களுக்கு எதிராக 385 விழிப்புணர்வு நடவடிக்கைகள் மேற்கொள்ளப்பட்டுள்ளன.

சுற்றுச்சூழலைப் பாதுகாப்பது, பல்லுயிர் பெருக்கத்தை மேம்படுத்துவது, வன உயிரினங்களின் வாழ்விடங்களைப் பாதுகாப்பது ஆகியவற்றை நோக்கமாகக் கொண்டு தமிழக அரசு இத்தகைய நடவடிக்கைகளைத் தொடர்ந்து மேற்கொண்டு வருவதாக தெரிவிக்கப்பட்டுள்ளது.

இயற்கையைப் பாதுகாக்கும் வகையில் முன்னுதாரணமாகத் திகழும் இந்தக் கிராமங்களுக்கு அரசு அளிக்க உள்ள ஊக்குவிப்பு நடவடிக்கைகள் பொதுமக்களிடையே வரவேற்பைப் பெறும் என எதிர்பார்க்கப்படுகிறது