நாகப்பட்டினம் – இலங்கை கப்பல் பயணத்திற்கு அதிரடி கட்டணக் குறைப்பு! 30 கிலோ வரை இலவச லக்கேஜ் – பயணிகளுக்கு பண்டிகை சலுகை

நாகப்பட்டினம்:

நாகப்பட்டினத்தில் இருந்து இலங்கையின் காங்கேசன்துறைக்கு இயக்கப்படும் பயணிகள் கப்பலில் பண்டிகைக் காலத்தை முன்னிட்டு சிறப்புச் சலுகைகள் அறிவிக்கப்பட்டுள்ளன. இதன்படி, ஒரு வழிப் பயணத்திற்கான கட்டணம் ரூ.500 குறைக்கப்பட்டுள்ளதுடன், பயணிகள் 30 கிலோ வரை பொருட்களை இலவசமாக எடுத்துச் செல்லவும் அனுமதி வழங்கப்பட்டுள்ளது.

ரூ.6,000 கட்டணம் ரூ.5,500 ஆக குறைப்பு!

நாகப்பட்டினம் – காங்கேசன்துறை இடையே கடந்த இரண்டரை ஆண்டுகளுக்கும் மேலாக பயணிகள் கப்பல் சேவை செயல்பட்டு வருகிறது. இந்த வழித்தடத்தில் இயக்கப்படும் கப்பல் மூலம் இந்தியா மற்றும் இலங்கை இடையே சுற்றுலா, ஆன்மிகம் மற்றும் வணிகம் சார்ந்து ஏராளமானோர் பயணம் செய்து வருகின்றனர்.

இந்த நிலையில், பயணிகளின் கோரிக்கையை ஏற்று பண்டிகைக் காலச் சலுகையாக ஒரு வழிப் பயணக் கட்டணம் ரூ.6,000-ல் இருந்து ரூ.5,500 ஆகக் குறைக்கப்பட்டுள்ளது. இதனால் பயணிகளுக்கு ரூ.500 சேமிப்பு கிடைக்கும்.

சில்லறை கொடுக்காததால் தகராறு! ஓடும் பேருந்தில் இருந்து பெண் நடத்துநர் கீழே தள்ளப்பட்டு உயிரிழப்பு!

30 கிலோ வரை இலவசமாகப் பொருட்கள் எடுத்துச் செல்லலாம்!

இதுவரை பயணிகளுக்கு வழங்கப்பட்ட லக்கேஜ் அனுமதியில் மாற்றம் செய்யப்பட்டு, தற்போது ஒரு பயணி 30 கிலோ வரை பொருட்களை கூடுதல் கட்டணமின்றி எடுத்துச் செல்லலாம் என அறிவிக்கப்பட்டுள்ளது. இதனால் அதிகப்படியான பொருட்களுடன் பயணம் செய்ய விரும்புவோருக்கு இந்த அறிவிப்பு பயனுள்ளதாக இருக்கும்.

55 ஆயிரத்துக்கும் மேற்பட்டோர் பயணம்!

இந்தியா – இலங்கை இடையிலான நட்புறவை மேம்படுத்தும் நோக்கில் தொடங்கப்பட்ட இந்தக் கப்பல் சேவையில், கடந்த இரண்டரை ஆண்டுகளில் இதுவரை 55,310 பயணிகள் பயணம் செய்துள்ளதாக கப்பல் நிறுவனத்தின் முதன்மை வணிக அலுவலர் சிவராம் தெரிவித்துள்ளார்.

மேலும், வானிலை ஆய்வு மையத்தின் எச்சரிக்கை உள்ள நாட்களைத் தவிர மற்ற நாட்களில் கப்பலை இயக்க நடவடிக்கை எடுக்கப்பட்டுள்ளதாகவும் அவர் தெரிவித்துள்ளார்.

பயணிகளுக்கு மகிழ்ச்சியான அறிவிப்பு

கட்டணக் குறைப்பு மற்றும் இலவச லக்கேஜ் சலுகை காரணமாக நாகப்பட்டினம் – இலங்கை இடையே பயணம் செய்ய விரும்பும் பொதுமக்களிடம் இந்த அறிவிப்பு வரவேற்பைப் பெறும் என எதிர்பார்க்கப்படுகிறது.