Jio News Tamilதமிழக முதல்வர் ஸ்டாலின் இன்று சென்னையில் நடைபெற்ற பன்னாட்டுப் புத்தகத் திருவிழாவின் நிறைவு விழாவில், “செம்மொழி இலக்கிய விருது” (Semmozhi National Literary Award) என்ற புதிய தேசிய அளவிலான விருதை அறிவித்துள்ளார்.
விருதின் பின்னணி – காரணம்
சமீபத்தில் 2025-ஆம் ஆண்டுக்கான சாகித்ய அகாடமி விருதுகள் அறிவிக்கப்படுவது மத்திய அரசால் நிறுத்தி வைக்கப்பட்டதாகக் கூறி, அதற்கு ஆக்கப்பூர்வமான ஒரு எதிர்வினையாக இந்த விருதை தமிழக அரசு அறிவித்துள்ளதாகவும் கூறப்படுகிறது. இலக்கியத்தில் அரசியல் குறுக்கீடுகள் இருக்கக்கூடாது என்பதை வலியுறுத்தி இந்த முடிவு எடுக்கப்பட்டுள்ளது என்று முதல்வர் தரப்பில் தெரிவிக்கப்பட்டுள்ளது.
அதாவது, சாகித்ய அகாடமி விருதுகளுக்கு நிகராக, ஏறத்தாழ அதற்கு மாற்றாக “செம்மொழி இலக்கிய விருது” அறிவிக்கப்பட்டுள்ளதாகவும் எழுத்தாளர்கள் மத்தியில் கூறப்படுகிறது.
யாருக்கெல்லாம் வழங்கப்படும்?
இது வெறும் தமிழுக்கு மட்டுமான விருது அல்ல. முதற்கட்டமாக பின்வரும் 7 மொழிகளில் வெளியாகும் சிறந்த இலக்கியப் படைப்புகளுக்கு வழங்கப்பட உள்ளன.
- தமிழ்
- தெலுங்கு
- கன்னடம்
- மலையாளம்
- ஒடியா
- வங்காளம்
- மராத்தி
பரிசுத் தொகை மற்றும் தேர்வு முறை
ஒவ்வொரு மொழிக்கும் தேர்ந்தெடுக்கப்படும் சிறந்த படைப்புக்கு தலா ₹5 லட்சம் பரிசுத் தொகை வழங்கப்படும்.
விருதாளர்களைத் தேர்வு செய்ய அந்தந்த மொழியைச் சார்ந்த புகழ்பெற்ற எழுத்தாளர்கள் மற்றும் அறிஞர்களைக் கொண்ட தனித்தனி நடுவர் குழுக்கள் அமைக்கப்படும். இதன் மூலம் வெளிப்படைத்தன்மை உறுதி செய்யப்படும் என முதல்வர் தெரிவித்துள்ளார்.
கலைஞர் செம்மொழித் தமிழ் விருது (வேறுபாடு)
ஏற்கனவே ஆண்டுதோறும் வழங்கப்பட்டு வரும் ‘கலைஞர் மு. கருணாநிதி செம்மொழித் தமிழ் விருது’ என்பது செம்மொழித் தமிழாய்வு மத்திய நிறுவனத்தால் (CICT) தமிழ் மொழி ஆய்வுக்கு வழங்கப்படுவது. ஆனால், இன்று அறிவிக்கப்பட்டுள்ள ‘செம்மொழி இலக்கிய விருது’ என்பது இந்திய அளவில் பல மொழிகளை உள்ளடக்கிய ஒரு தேசிய இலக்கிய விருது ஆகும்.
திராவிட மாடல் 2.0 :-
இதே விழாவில், வரும் காலங்களில் “திராவிட மாடல் 2.0” ஆட்சியின் கீழ் இந்த புத்தகத் திருவிழா இன்னும் பிரம்மாண்டமாக உலகத்தரம் வாய்ந்ததாக நடத்தப்படும் என்றும் முதல்வர் முக.ஸ்டாலின் உறுதியளித்துள்ளார்.
Manoj
