News Update
டெல்லியில் மனநல மருத்துவமனையில் நடிகை மீரா மிதுன் அனுமதிக்கப்பட்டுள்ளதாக நீதிமன்றத்தில் போலீஸார் தெரிவித்துள்ளனர்.
சென்னையைச் சேர்ந்தவர் மீரா மிதுன்(34). நடிகையும், மாடல் அழகியுமான இவர் சில தமிழ் திரைப்படங்களில் துணை நடிகையாக நடித்தார். பிக் பாஸ் தமிழ் சீசனிலும் பங்கேற்றார். இந்த நிலையில், பட்டியலினத்தவர் குறித்து அவதூறாக பேசி சமூக வலைதளத்தில் மீரா மிதுன் வீடியோ வெளியிட்டதாக கடந்த 2021-ம் ஆண்டு பல்வேறு அமைப்புகளை சேர்ந்தவர்கள் போலீஸில் புகார் அளித்தனர். இதனை விசாரித்த சென்னை மத்திய குற்றப்பிரிவு போலீஸார், மீரா மிதுன், அவரது நண்பர் சாம் அபிஷேக் ஆகியோர் மீது வழக்குப்பதிவு செய்து அவர்களை கைது செய்தனர்.
இதன் பின் அவர்கள் இருவரும் ஜாமீனில் விடுவிக்கப்பட்டனர். இந்த வழக்கு விசாரணையின் போது மீரா மிதுன் தொடர்ந்து ஆஜராகாததால் கடந்த 2022-ம் ஆண்டு ஆகஸ்ட் மாதம் அவருக்கு எதிராக பிடிவாரண்ட் பிறப்பித்து நீதிமன்றம் உத்தரவிட்டது. இதனையடுத்து மீராமிதுனை கைது செய்ய போலீஸார் தேடி வந்தனர். இந்த நிலையில் டெல்லி விதிகளில் சுற்றித் திரிந்த மீரா மிதுனை போலீஸார் கண்டுபிடிக்கப்பட்டு அங்குள்ள காப்பகத்தில் தங்க வைக்கப்பட்டார்..
இந்த நிலையில் அந்த வழக்கு சென்னை மாவட்ட முதன்மை செசன்ஸ் நீதிமன்றத்தில் நீதிபதி எஸ்.கார்த்திகேயன் முன்னிலையில் நேற்று விசாரணைக்கு வந்தது. அப்போது சிறப்பு அரசு வக்கீல் எம்.சுதாகர், மத்திய குற்றப்பிரிவு போலீஸார் தரப்பில் ஒரு அறிக்கை தாக்கல் செய்தார். அதில், ‘மீராமிதுன் டெல்லியில் உள்ள மனநல மருத்துவமனையில் அனுமதிக்கப்பட்டுள்ளார். இதனால் அவரை சென்னை அழைத்து வர முடியவில்லை. பயணம் செய்வதற்கு ஏற்ற வகையில் அவரது உடல்நலம் சீரானதும் சென்னை அழைத்து வந்து நீதிமன்றத்தில் ஆஜர்படுத்துகிறோம்’ என கூறப்பட்டிருந்தது. இதைத்தொடர்ந்து, வழக்கின் விசாரணையை தள்ளிவைத்து நீதிபதி உத்தரவிட்டார்.
