News Update
கரூர் கூட்ட நெரிசலில் 41 பேர் உயிரிழந்த சம்பவத்திற்கு பிறகு தவெக தலைவர் விஜய் நீண்ட நாட்கள் கழித்து காஞ்சிபுரத்தில் நாளை (நவம்பர் 23) நடைபெறும் நிகழ்ச்சியில் மக்களை சந்திக்கிறார்.
கரூர் வேலுச்சாமிபுரத்தில் செப்டம்பர் 27-ம் தேதி தவெக தலைவர் விஜய் பரப்புரை மேற்கொண்டார். அப்போது ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இந்த சம்பவம் நாடு முழுவதும் பெரும் அதிர்வலைகளை ஏற்படுத்தியது இதற்கு பிறகு விஜய் பிரசாரம் மேற்கொள்ளவில்லை. இந்த நிலையில், நீண்ட நாளுக்குப் பிறகு காஞ்சிபுரத்தில் நாளை நடைபெறும் நிகழ்ச்சியில் விஜய் பங்கேற்கிறார்.
காஞ்சிபுரம் மாவட்டம், சுங்குவார்சத்திரம் ஜேப்பியார் பொறியியல் கல்லூரி வளாகத்தில் தவெக தலைவர் விஜய், காஞ்சிபுரம் மாவட்ட மக்களுடனான சந்திப்பில் கலந்து கொள்கிறார். இந்நிகழ்ச்சியில் அம்மாவட்டத்தைச் சேர்ந்த 2 ஆயிரம் பேர் மட்டுமே உள்ளரங்க நிகழ்ச்சியில் பங்கேற்பார்கள் என்று தவெக திருப்பெரும்புதூர் மத்திய ஒன்றிய செயலாளர் எஸ்.கார்த்திக், காவல்துறை பாதுகாப்பு கோரி வழங்கியுள்ள மனுவில் தெரிவித்துள்ளார்.
இந்த நிகழ்ச்சிக்காக ஜேப்பியார் கல்லூரி வளாகத்தில் கடந்த 5 நாட்களாக தவெக தொண்டரணியினர் பயிற்சி மேற்கொண்டு வருகின்றனர். ஓய்வு பெற்ற காவல்துறை அதிகாரிகள் இந்த பயிற்சிகளை வழங்கி வருகின்றனர்.இப்பயிற்சியை பெறும் தொண்டரணியினருடன் விஜய் ஆலோசனை நடத்துகிறார். இதனைத் தொடர்ந்து அப்பகுதி பொதுமக்களையும் சந்தித்து விஜய் குறைகளைக் கேட்கிறார்.
News Update