News Update
மதுரை, கோவையில் மக்கள் தொகை குறைவு என்பதால் மெட்ரோ ரயில் திட்டங்கள் நிராகரிக்கப்பட்டதாக மத்திய நகர்ப்புற விவகாரங்கள் துறை அமைச்சகம் விளக்கமளித்துள்ளது.
தமிழ்நாட்டில் சென்னையில் மெட்ரோ ரயில் திட்டம் சிறப்பான முறையில் செயல்பட்டு வருகிறது. இந்த நிலையில் மதுரை மற்றும் கோவை மெட்ரோ ரயில் திட்டங்களுக்கு விரிவான திட்ட அறிக்கை சமர்பிக்கப்பட்டது. இதன் காரணமாக மதுரை, கோவைக்கு மெட்ரோ ரயில் திட்டம் வரும் என்று இந்த இரண்டு மாவட்ட மக்களும் ஆவலுடன் காத்திருந்தனர். ஆனால், இந்த இரண்டு திட்டங்களையும் மத்திய அரசு நிராகரித்து விட்டதாக நேற்று முன்தினம் தகவல் வெளியானது. இதற்கு தமிழ்நாடு முதலமைச்சர் மு.க.ஸ்டாலின் உள்பட பல்வேறு தலைவர்கள் அதிருப்தி தெரிவித்தனர்.
இந்த நிலையில், இந்த திட்டங்களை ஏன் நிராகரித்தோம் என்று மத்திய நகர்ப்புற விவகாரங்கள் துறை அமைச்சகம் விளக்கமளித்துள்ளது. இது தொடர்பாக இந்த அமைச்சரகத்தில் இருந்து தமிழ்நாடு அரசு கடிதம் எழுதப்பட்டுள்ளது. அந்த கடிதத்தில்,” கோவை மற்றும் மதுரை மெட்ரோ ரயில் திட்டங்களுக்கான தமிழக அரசின் பரிந்துரையை தெரிவித்து வந்த கடிதங்கள் சரிபார்க்கப்பட்டன. இந்தத் திட்டங்கள் ஆய்வு செய்யப்பட்டதாக தெரிகிறது.அந்த ஆய்வில் சில விஷயங்கள் கவனிக்கப்பட்டன.
கோவையில் 34 கி.மீ. நீளத்துக்கு மெட்ரோ ரயில் இயக்க திட்டமிடப்பட்ட நிலையில் அங்கு ஏற்கெனவே உள்ள சாலைப்போக்குவரத்தின் பயண நேரம் மெட்ரோ ரயிலின் பயண நேரத்தை விட குறைவாக உள்ளது. மேலும் மக்கள்தொகையை கணக்கிடும்போது சென்னை 1- ம் கட்ட மெட்ரோ ரயில் திட்டத்தை விட 4 லட்சம் பேர் மட்டுமே அதிகமாக இருப்பதாக தெரியவந்துள்ளது. பயண நேரத்தின் அடிப்படையில் மக்கள் மெட்ரோவுக்கு மாற வாய்ப்பில்லை என தெரிய வருகிறது.
மதுரையைப் பொறுத்தவரை அங்கு மக்கள்தொகை குறைவாக உள்ளது. மெட்ரோ ரெயில் இயக்க வேண்டும் என்றால் குறைந்தபட்சம் 20 லட்சம் மக்கள் இருக்க வேண்டும் என திட்டமிடப்பட்டு இருக்கிறது. ஆனால் 2011- ம் ஆண்டு கணக்கெடுப்பின்படி மதுரையின் மக்கள்தொகை 15 லட்சம் மட்டுமே. இந்த காரணங்கள் தவிர மெட்ரோ ரயில் திட்டத்துக்காக பல கட்டிடங்கள் இடிக்கப்பட வேண்டும். பல கட்டிடங்கள் மிக விலை உயர்ந்ததாக இருக்கலாம். இதனால் பொதுமக்களுக்கு சிரமங்கள் ஏற்படலாம். கோவையின் மக்கள்தொகை 15.84 லட்சம் உள்ளது. எனவே 20 லட்சம் மக்கள்தொகைக்கு மேற்பட்ட நகரங்களிலேயே மெட்ரோ ரயில் திட்டங்கள் செயல்படுத்த திட்டமிடலாம்” என்று அதில் தெரிவிக்கப்பட்டுள்ளது.
News Update